KUHAMISHWA kwa jukumu la ukusanyaji wa kodi za majengo kutoka katika
halmashauri na kupelekwa katika Mamlaka ya Mapato (TRA), kumeungwa mkono
na baadhi ya wabunge, jambo lililoonesha kwenda kinyume na maoni ya
mameya wa halmashauri mbalimbali nchini.
Jana Mbunge wa Singida Mjini, Musa Sima (CCM), aliunga mkono hatua
hiyo ya serikali na kusema anachoona ni serikali kupunguzia mzigo
halmashauri za wilaya, miji na manispaa katika ukusanyaji wa kodi hiyo.
Aliitaka serikali kama ilivyoahidi, kupeleka fedha zote watakazokusanya
katika kodi hiyo katika halmashauri husika.
Sima aliungana na Mbunge wa Mkalama, Alan Kiula (CCM), ambaye juzi
alisema TRA ina wafanyakazi wenye uzoefu na vitendea kazi vya kukusanya
kodi kuliko halmashauri yoyote, hivyo ni sahihi wakabidhiwe jukumu hilo.
Kwa mujibu wa Kiula, halmashauri nyingi zilishindwa hata kukadiria
majengo ili kupata kodi stahiki lakini kwa hatua hiyo ya serikali,
anatarajia halmashauri sasa zitapata kodi stahiki.
Mbunge wa Chemba, Juma Nkhamia (CCM), alienda mbali zaidi na kutaka
wakati wa kukusanya kodi hizo, watendaji hao wa TRA pia wahoji wahusika
walikopata fedha za kujenga majumba makubwa. Pia aliitaka Serikali
kuhakikisha kuwa ahadi ya kurejesha fedha hiyo, inatimizwa ili
halmashauri zifanye kazi zake.
Katika hotuba ya Bajeti ya Serikali ya 2016/2017, Waziri wa Fedha na
Mipango, Dk Philip Mpango, alisema kodi za majengo hazitakusanywa na
halmashauri, badala yake TRA ndiyo inayopewa mamlaka hayo ya kukadiria,
kukusanya, kuhifadhi na kuiwakilisha katika halmashauri husika.
Mbali na TRA kupewa mamlaka ya kukusanya kodi ya majengo, serikali
pia ilipendekeza kupunguza misamaha ya kodi za majengo, ili majengo
mengi zaidi yaingizwe katika orodha ya kulipa kodi.
Chanzo Gazeti La Habari Leo
0 comments:
Post a Comment