MAAFISA MAWASILIANO SERIKALINI WATAKIWA KUTOA TAARIFA ZA SERIKALI KWA WAKATI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Na Eleuteri Mangi

Maafisa Mawasiliano Serikalini wametakiwa kuendelea kuitendea haki taaluma yao kwa kuhabarisha na kuisemea Serikali juu ya utoaji huduma za jamii na utekelezaji wa miradi mbalimbali ya maendeleo.

Hayo yamesemwa na Katibu Mkuu Wizara ya Habari, Utamaduni, Sanaa na Michezo Prof. Elisante Ole Gabriel kwa niaba ya Katibu Mkuu Kiongozi Balozi Mhandisi John Kijazi wakati wa kufunga Kikao Kazi cha mwaka cha Maafisa Mawasiliano Serikalini mjini Dodoma.

“Mtaheshimika kwa kuiambia jamii na kuwapa taarifa kwa wakati. Nguvu ya habari ni kubwa, muitumie vizuri kwa kuongeza thamani ya kazi zenu na wafikisheni viongozi wenu kwenye mafanikio ya malengo yaliyowekwa ambapo uwepo wenu utasaidia kwa mchango wako wa kuwa mbunifu katika kutekeleza majukumu yako” alisema Prof. Ole Gabriel.  

Prof. Ole Gabriel aliwahimiza Maafisa hao kushirikiana na vyombo vya habari katika kutoa habari kwa manufaa ya Watanzania kwa kuzingatia Sheria za nchi ikiwemo Sheria ya Huduma za Habari ya mwaka 2016 na kanuni zake.  

Kwa upande wake Mkurugenzi wa Idara ya Habari (MAELEZO) ambaye pia ni Msemaji Mkuu wa Serikali Dkt. Hassan Abbasi amesema kuwa ili Vitengo vya Mawasiliano Serikalini viweze kuuhabarisha Umma kwa wakati ni lazima kuwe na mawasiliano ya kimkakati ambayo yatasaidia kuisemea Serikali kwa wananchi wake katika mambo mbalimbali yanayotekelezwa na Serikali yao.

Dkt. Abbasi aliongeza kuwa ili kufikisha taarifa kwa umma kwa wakati zipo njia kuu ambazo zinaweza kusaidia kufikia malengo ya mawasiliano ya kimkakati katika kuhabarisha umma ikiwemo kuweka malengo makubwa.

“Rais Jamhuri ya Muungano wa Tanzania Dkt. John Pombe Magufuli alipoweka lengo la ununuzi wa Ndege ilionekana inawezekana vipi? Matokeo yake ndege mpya aina ya Bombardier zipo na zinafanya kazi nchini,haya ni matokeo ya malengo makubwa aliyojiwekea, nasi tufanye hivyo katika tasnia ya habari” alisema Dkt. Abbasi.

Awali akimkaribisha Mgeni Rasmi kufunga kikao kazi hicho, Mwenyekiti wa Mkutano huo ambaye pia ni Naibu Katibu Mkuu Wizara ya Habari, Utamaduni, Sanaa na Michezo Nuru Millao aliwataka Maafisa Mawasiliano kuandika habari na makala za miradi mbalimbali ya maendeleo inayotekelezwa na Serikali pamoja na kufuatilia na kujibu ya hoja na kero za wananchi kwa wakati kwa kushirikiana na Idara ya Habari (MAELEZO) ambayo ndiyo kiunganishi cha Vitengo vya Mawasiliano Serikalini nchini.

Naye Mwenyekiti wa Chama cha Maafisa Mawasiliano ya Serikalini (TAGCO) Paschal Shelutete amemuahidi Mgeni Rasmi kwa niaba ya Washiriki wa Mkutano huo kuwa watayafanyia kazi maagizo yaliyotolewa pamoja na maazimio yaliyofikiwa katika mkutano huo  na kufanya kazi kwa weledi na kwa wakati ili kuhakikisha kazi za Serikali zinafahamika kwa Umma wa Watanzania.

Mkutano huo ulihudhuriwa na jumla ya washiriki wapatao 231 kutoka Wizara mbalimbali, Idara za Serikali, Taasisi, Wakala, Miji, Majiji, Mikoa na Halmashauri mbalimbali nchini.

Mwisho.