ALAT KUPATA FURSA KATIBA MPYA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 Waziri wa Katiba na Sheria, Dk Asha-Rose Migiro amewasilisha katika Bunge Maalumu, mapendekezo ya Jumuiya ya Tawala za Mitaa nchini (ALAT) ya kuongezwa kwa sura mpya katika mchakato wa Katiba.

Hayo yalisemwa na Mwenyekiti wa Bunge hilo, Samuel Sitta, alipokuwa akizungumza na waandishi wa habari bungeni kuhusu maendeleo ya mchakato wa Katiba Mpya.

Sitta alisema amepokea mapendekezo kutoka kwa wajumbe mbalimbali kati ya Jumatatu na Jumanne, likiwamo la Dk Migiro. “Katika mfumo wowote wa utawala huwezi kuacha kuelezea utawala unaowahusu mamilioni ya watu, uwe na serikali moja, mbili na tatu vyovyote unavyotaka,” alisema.

Alisema Kamati ya Uongozi iliyoketi mjini hapa juzi imekubali kupelekwa kwa mapendekezo hayo katika kamati za Bunge kwa ajili ya kujadiliwa. Alisema hayo ni maboresho ya mambo yaliyoko katika sura ya pili ya Rasimu ya Katiba.

“Yaingie yajadiliwe na kamati ili tuone yanakaaje ndani ya mfumo wa Katiba,” alisema Sitta.

Alisema pia wamekubali andiko la Tume ya Mabadiliko ya Katiba kuhusu ardhi, mazingira na rasilimali za Taifa kuingizwa kwenye Katiba.

Awali mambo hayo yalikuwa yamependekezwa kuingizwa katika Katiba za nchi washirika kama mfumo wa serikali tatu ungekubaliwa. Alisema kwa bahati nzuri baada ya wajumbe kukutana na wananchi wao, walileta mapendekezo ya kutaka ardhi, uendeshaji wa maliasili na mazingira.

Aidha, alisema kuwa kamati ya uongozi imepokea mapendekezo ambayo anadhani kuwa yataunda sura mpya ya lengo la maendeleo na kiuchumi na kijamii kwa madhumuni ya kujitegemea. Sitta alisema mjumbe mwingine Hawa Ng’umbi alipeleka mapendekezo ya kuwapo kwa haki ya watumiaji wa bidhaa.
Chanzo;Mwananchi