CAG UTOH AWAKARIBISHA UKAWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Mdhibiti na Mkaguzi Mkuu wa Hesabu za Serikali (CAG),Ludovick Utouh

Mdhibiti na Mkaguzi Mkuu wa Hesabu za Serikali (CAG), Ludovick Utouh, amewataka viongozi wa  Umoja wa Katiba ya Wananchi (Ukawa), kufuata taratibu  endapo wanataka afanye ukaguzi wa matumizi ya fedha  katika Bunge Maalum la Katiba.
Utouh alitoa kauli hiyo jana wakati akizungumza na NIPASHE kwa njia ya simu kuhusiana na tamko lililotolewa na baadhi ya viongozi wa Ukawa la kumtaka CAG kufanya ukaguzi maalum za  matumizi ya fedha kwenye Bunge hilo wakidai kubaini kuwapo kwa ufisadi wa fedha za umma.
Utouh aliliambia NIPASHE kuwa viongozi hao wanatakiwa kufuata utaratibu.
Alisisitiza kuwa tamko hilo halitambui wala halijui kwa kuwa halijafuata taratibu zinazotakiwa kuwasilishwa
ofisini kwake kwa ajili ya kuanza kufanya uchunguzi wa matumizi mabaya ya fedha hizo.
Alisema ofisi ya CAG ingekuwa inafanya kazi kwa shinikizo ya kwenye majukwaa au magazeti, ofisi yake isingekuwa inafanya kazi kwa ufanisi wala kufikia malengo yanayotakiwa.
 “Mimi sijalipokea ombi hilo kabisa wala silijui, na sifanyi kazi kwa shinikizo la majukwaa na Iam not aware of that,” alisisitiza Utouh.
Aliongeza kuwa kuna taratibu zilizowekwa kwa watu wanaotaka kaguzi zifanyike na kusema kuwa kama wanaona kuna haja wanapaswa kufuata taratibu  zinazotakiwa  pamoja na kumshawishi afanye kazi ya ukaguzi.
Tamko la kumtaka CAG kufanya ukaguzi wa matumizi ya fedha katika Bunge lilitolewa na viongozi wa umoja huo wakati wakizungumza na waandishi wa habari jijini Dar es Salaam juzi.
Viongozi hao ni pamoja na Mwenyekiti wa Chadema, Freeman Mbowe, Mwenyekiti wa CUF, Prof. Ibrahim Lipumba na Mwenyekiti wa NCCR-Mageuzi, James Mbatia.
Mbali  na kumtaka CAG kufanya ukaguzi, pia walimtaka Rais Kikwete kusitisha mara moja shughuli za Bunge hilo ili lisiendelee kufuja fedha hizo ambazo ni  mali za Watanzania.
Walionya kuwa, endapo hataitikia wito huo, Ukawa utawaongoza wananchi kufanya maandamano na mikutano ya hadhara nchi nzima kupinga najisi inayotiwa kwenye maoni yao.
UKAWA WAMJIBU
Kwa upande wao,  Ukawa kupitia kwa Katibu Mkuu wa Chadema, Dk. Wilbroad Slaa, alisema hakuna sheria inayowaruhusu kuwasiliana na CAG. Slaa alisema wao wamepaza sauti kama Watanzania wengine, hivyo CAG anapaswa kuzingatia na kuchukua maamuzi ya haraka na siyo Ukawa kumwandikia barua au kumfuata kwa mazungumzo.
“Sheria haitupi mamlaka ya kumwandikia CAG, nimefanya kazi bungeni ninaifahamu vizuri sheria hiyo, hivyo hakuna sheria inayoturuhusu sisi kumwandikia barua CAG,” alisema Dk. Slaa.
Aliongeza kuwa mwenye mamlaka ya kumwandika CAG au kumfuata ni Rais, Waziri Mkuu na Kamati za Bunge.
‘Sisi ni kama watanzania wengine tumempa taarifa, CAG ni mtanzania kama sisi anafahamu fedha zinakofujwa, anajua vizuri fedha zinavyoibwa,” alisema Dk. Slaa.
 

CHANZO: NIPASHE