MAFAO YA PENSHENI YA WASTAAFU JUU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

KILIO cha muda mrefu cha wastaafu kutofautina mafao ya pensheni  katika Mifuko ya Hifadhi ya Jamii, sasa kimepatiwa majibu baada ya Serikali kuamua kuanzisha fomula mpya ya kukokotoa.

Fomula hiyo mpya iliyoanza kutumika Julai mosi, mwaka huu, itasababisha ongezeko la fedha kwa wastaafu kwa asilimia 72.5 kutoka asilimia 60 na 67 iliyokuwa ikitolewa na mifuko kwa wanachama wake.

Wastaafu watakaofaidika na malipo yanayotokana na fomula hiyo ni wale waliostaafu kuanzia Julai mosi mwaka huu.

Umamuzi huo ulitangazwa Agosti 5, mwaka huu, mkoani Dodoma na Waziri wa Kazi na Ajira, Gaudensia Kabaka, ambapo alisema ukokotoji huo utahusu mifuko yote ya hifadhi ya jamii isipokuwa LAPF na PSPF.

Alisema wanachama wa mifuko ya NSSF, PPF na GEPF waliotakiwa kupata asilimia 60-67 ya pensheni yao kabla ya fomula hiyo mpya sasa watalipwa asilimia 72.5 ya mishahara yao.

Waziri Kabaka, alisema ukokotoaji huo utafanya kiwango cha chini cha pensheni kuongezwa hasa kwa mifuko PSPF, GEPF na LAPF ambayo haikuwa na kiwango cha chini.

“Kwa mfano, hapa mstaafu anayepata pensheni ambayo ni chini ya asilimia 40 ya mshahara wake uliokokotolewa atalipwa asilimia 40 ya kima cha mshahara wa sekta husika,” alisema.

Alisema fomula hiyo pia imeleta mabadiliko makubwa ambapo sasa itatumia wastani wa mshahara wa miaka mitatu badala ya miaka mitano uliokuwa ukitumika.

Alisema wastani wa miaka mitatu ya mwisho kabla ya kustaafu kutamuwezesha mwanachama kulipwa vizuri zaidi.

“Hatua hii itasaidia kuondoa malalamiko kwa wanachama kwani wastani wa miaka mitano ambao ulikuwa unatumiwa na baadhi ya mifuko unapunguza mafao ya wanachama,” alisema.

Waziri Kabaka alisema ongezeko hilo linatokana na kifungu cha 32(a) cha Sheria Na.8 ya mwaka 2008 kinachoelekeza hatua za uthaminishaji wa mafao kufanyika ili kuwafanya wastaafu na wanaopokea mafao kuendelea kuishi maisha yenye staha.

Alisema kanuni hizo zinamruhusu mwanachana kuchagua kupokea asilimia 100 ya pensheni au kupokea mkupuo na baadaye kupata asilimia 75 ya pensheni.

Hata hivyo, alisema kanuni hizo hazitawagusa wanachama wa sasa wa mifuko ya pensheni ya PSPF na LAPF bali wale wapya tu.

 Chanzo:Tanzania Daima