MAPALALA AKUMBUKA MINYORORO ALIYOFUNGWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

Mjumbe wa Bunge Maalumu la Katiba, James Mapalala amekumbushia minyororo aliyofungwa wakati akidai mfumo wa vyama vingi, akisema kwamba haiwezi kumrudisha tena CCM.

Mapalala alisema kuwa wanaopiga kelele kuwa amenunuliwa na CCM ili ajadili mambo ya serikali mbili, wanafanya hivyo kwa kutojua kilichomo ndani ya moyo wake.

Mwanasiasa huyo mkongwe alisema kuwa anaumizwa na taarifa za kuhusishwa kwake na CCM kwa kuwa waliomo ndani ya chama hicho hawana mawazo ya kuona mbali kama alivyo yeye.

“Mimi nilifungwa minyororo ya chuma, nikakaa kule Mafia kizuizini nikitaka mfumo wa vyama vingi, leo hii na uzee huu nirudi CCM kwa kununuliwa ili iweje? Ni uongo wa mchana huo,” alisema Mapalala.

Alisema kuwa vikao vinavyoendelea mjini Dodoma, havina demokrasia kwa kuwa yanayofanyika ni ya kulazimishana.

Alitoa mfano kuwa katika kamati yake Namba moja, ambayo ndiyo Kamati ya Waziri Mkuu, wajumbe wamejaa mitazamo ya CCM.

Wachache tu ndio ambao wanapingana na mitazamo hiyo.

Alisema muundo unaolazimishwa wa Serikali mbili wa Chama Cha Mapinduzi, hautaleta maana yoyote nchini badala yake utasogeza mifarakano na migongano.

Kwa upande mwingine alikitupia lawama CCM kwamba wanaongoza kwa mabavu na wengi hawajui historia ikiwemo kutomchana Mungu.

“Kingine ambacho kinawasumbua ni kwamba wanaamini kuwa wataongoza milele wakati hawajui kuwa wao sio wengi bali wingi wao unatokana na kuwa bado wako madarakani,” alisema.

Alitaka kuwa kilichompeleka Dodoma ni uzalendo lakini kama sivyo angekuwa nje kama ilivyo kwa Ukawa na akawapongeza Ukawa kuwa wanajua kujenga hoja zenye mashiko kuliko upande wa CCM.

 Chanzo;Mwananchi