NAHODHA ASHANGAA VIONGOZI PEKEE KUBANWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Mwenyekiti wa Kamati namba mbili ya Bunge Maalumu la Katiba, Shamsi Vuai Nahodha.

Mwenyekiti wa Kamati namba mbili ya Bunge Maalumu la Katiba, Shamsi Vuai Nahodha, amesema iko dhana kwa wananchi wengi kuwa watu wanaopasa kulinda misingi ya maadili ya umma ni viongozi pekee na watumishi wengine kuachwa.
Nahodha alisema hayo jana mjini Dodoma wakati akizungumza na waandishi wa habari kueleza yaliyojiri katika kamati yake.Ibara ya 15 (1) ya rasimu ya katiba inasema:
“Kiongozi wa umma wakati anapotekeleza shughuli za kiserikali, akipewa zawadi, zawadi hiyo itakuwa ni mali ya Jamhuri ya Muungano na ataiwasilisha kwa Katibu Mkuu Kiongozi kupitia kwa Katibu Mkuu wa Wizara au kiongozi wa taasisi ya Serikali inayohusika, akiainisha: (a) aina ya zawadi; (b) thamani ya zawadi; (c) sababu ya kupewa zawadi; na (d) mtu au mamlaka iliyotoa zawadi hiyo.”
“Katika ibara hiyo (2) Neno “zawadi” kama lilivyotumika katika Ibara hii linajumuisha kitu chochote chenye thamani atakachopewa Kiongozi wa umma katika utekelezaji wa shughuli za umma.”
Ibara ndogo ya tatu inasema: “Bunge litatunga sheria itakayosimamia, pamoja na mambo mengine, thamani, kiwango, aina na uhifadhi wa zawadi kwa Jamhuri ya Muungano.”
“Iko dhana kuwa wanaopaswa kulinda misingi ya maadili ya umma ni viongozi pekee na kwamba, ni kwanini sheria zitungwe kwa ajili ya viongozi pekee na kuwaachia watumishi wa umma?” alihoji Nahodha.
Alisema maamuzi ya walio wengi katika kamati hiyo ni kuwa kiongozi abanwe na mtumishi wa umma na kwamba, wamefanya marekebisho ya ibara hiyo na kusomea kiongozi au mtumishi wa umma.
Nahodha alisema wananchi wengi wanakerwa wanapoona baadhi ya viongozi wa umma na watumishi wanatumia madaraka yao vibaya, wanatuhumiwa kwa rushwa na wanaona hatua hazichukuliwi kama wanavyotarajia.
“Sisi kama viongozi tunaishi kwenye jamii, tunasikia malalamiko ya wananchi. Ni jambo linagusa maisha ya wananchi moja kwa moja. Ndiyo maana tulikuwa na mjadala mzito,” alisema.
Alisema kiongozi ana nafasi yake, lakini hata mtumishi wa umma anapopewa zawadi anapaswa kupeleka kwenye mamlaka husika kama, ambavyo kiongozi wa umma ametajwa.
“Kwanini sheria ziwe zinatugwa kwa viongozi...wakati mwingine tunasikia hata maafisa wa kawaida wanatuhumiwa. Tunasema ili kujenga nidhamu viongozi wabanwe na watumishi wa umma wabanwe,” alisema.
Alisema kamati hiyo imerekebisha ibara hiyo na kusema kiongozi au mtumishi wa umma anapopewa zawadi kwa utaratibu ule ule uliowekwa kwa kiongozi, mtumishi naye afanye hivyo hivyo.

CHANZO: NIPASHE