NJAA BUNGE LA KATIBA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

  Wajumbe hawajalipwa posho kwa siku 10

Naibu Waziri wa Fedha,Mwigulu Nchemba.

 

Wakati makundi mbalimbali ya kijamii yakiendelea kupaza sauti kutaka Bunge Maalum la Katiba kusitishwa ili yapatikane maridhiano baina ya pande zinazovutana, wajumbe wa Bunge hilo wanaoendelea na vikao mjini hapa wanalia njaa kutokana na kutolipwa posho zao.
Habari zilizothibitishwa na uongozi wa Bunge hilo zinasema kuwa wajumbe hao wanaoendelea na vikao hivyo, hawajalipwa fedha hizo za posho kwa siku 10 mfululizo.
Wajumbe kutoka Umoja wa Katiba ya Wananchi (Ukawa) unaoundwa na vyama vya Chadema, CUF na NCCR-Mageuzi, walisusia Bunge hilo tangu Aprili 16, mwaka huu wakidai kuwa rasimu inayojadiliwa ni ya CCM na siyo iliyowasilishwa na iliyokuwa Tume ya Mabadiliko ya Katiba.
Jana, NIPASHE lilishuhudia baadhi ya wajumbe hao wakihaha kuzungumza na baadhi ya wanahabari, wakitaka wasaidiwe kupaza sauti zao ili uongozi wa bunge uone umuhimu wa kuwalipa posho hizo.
Baadhi ya wajumbe, walidai kuwa  wanakabiliwa na hali ngumu ya maisha kutokana na kukosa fedha za kujikimu kwa siku zote hizo (10) ambazo hawajalipwa stahili zao.
Walisema inawawia vigumu kutekeleza majukumu ya kuandika katiba kutokana na kutolipwa posho, huku wakieleza kuwa fedha walizotakiwa kulipwa zimerejeshwa Hazina kwa hofu ya kuahirishwa bunge hilo.
Kufuatia malalamiko hayo, waandishi wa NIPASHE walimtafuta Katibu wa Bunge Maalum, Yahaya Khamis Hamad, ambaye alithibitisha kutolipwa wajumbe hao tangu Agosti 16, mwaka huu kutokana na sababu zilizo nje ya uwezo wao.
”Fedha zilizokuwa kwenye akaunti ya Bunge, hazikuwa zinatosha kulipa posho za wajumbe wote. Lakini tuliwalipa kiasi cha Sh. 70,000 kama posho ya kikao na posho ya kujikimu Sh. 230,000... Ni kweli hatujawalipa kutokana na uchache wa fedha,” alisema katibu huyo.
Aidha, alisema wajumbe hao wanalipwa posho zao kwa wiki moja moja na kwamba, hilo halihusiani na taarifa kuwa Bunge hilo lingeahirishwa.
Kwa mujibu wa Hamad, uongozi wa Bunge unaogopa kuwalipa wajumbe fedha za muda mrefu kutoka na baadhi ya wajumbe kutoroka na kutohudhuria vikao.
”Ingawa wajumbe wanakasirika, lakini tumeshauriana tuwalipe kwa wiki moja moja.
Hata hivyo, hatuna taarifa za fedha kurejeshwa Hazina na huo ni uzushi,” alisema kufuatia taarifa kwamba fedha hizo zilirudishwa Hazina.
Naibu Waziri wa Fedha, Mwigulu Nchemba, alithibitisha fedha hizo kurejeshwa Hazina kutokana na makosa yaliyojitokeza baada ya kuingizwa kwenye akaunti ya Bunge la Jamhuri ya Muungano.
“Hilo ni suala la kiutawala tu, fedha ziliwekwa katika akaunti ya Bunge la Jamhuri badala ya akaunti ya Bunge Maalum kwa ajili ya accountability (uwajibikaji). Bunge Maalum limefungua akaunti ya Bunge Maalum,” alisema.
JAMES MAPALALA
Katika hatua nyingine;  Mjumbe wa Bunge hilo, James Mapalala, alisema kuwa katika vikao vyote vya kamati yake, amekuwa akitoka nje ya kikao pale wajumbe wenzake wanapojadili suala la serikali mbili.
Mapalala aliwaambia waandishi wa habari jana kuwa amekataa kujadili masuala yanayohusu Muungano na muundo wa serikali kwa kutoka nje ya kikao mara tatu kila wanapofikia kujadili na kufanya maamuzi.
Bunge Maalum la Katiba lilianza vikao vyake Agosti 5, mwaka huu likiwa na wajumbe kutoka kundi la 201, wachache kutoka vyama vidogo vya siasa, na walio wengi kutoka Chama cha Mapinduzi (CCM).
Bunge hilo linaendelea na vikao vyake vya kamati bila kuwapo kwa wajumbe kutoka Ukawa.

SOURCE: NIPASHE