POLEPOLE AWAPA ANGALIZO CCM KUBARIKI BUNGE LA KATIBA KUENDELEA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Aliyekuwa Mjumbe wa Tume ya Mabadiliko ya Katiba, Humphrey Polepole.

Viongozi wakuu  wa Chama Cha Mapinduzi (CCM), wamepewa angalizo kuwa wasipokuwa makini  wataingia katika historia mbaya ya kuliletea taifa machafuko kama itakavyokuwa kwa wajumbe wa Bunge Maalum la Katiba.
Angalizo hilo limetolewa na aliyekuwa Mjumbe wa Tume ya Mabadiliko ya Katiba, Humphrey Polepole, katika mahojiano maalum na NIPASHE jana jijini Dar es Salaam kuhusiana na uamuzi wa Kamati Kuu (CC) ya CCM kubariki Bunge Maalum liendelee kujadili Rasimu ya Katiba.
Polepole alisema alitegemea wajumbe wa CC ya  chama hicho tawala waliofanya kikao juzi mjini Dodoma wangeweza kukubaliana namna ya kufanya kusitisha majadiliano ya katiba mpya  yanayo endelea Dodoma katika Bunge hilo bila kuwapo wajumbe wa Umoja wa Katiba ya Wananchi (Ukawa).
“Kwa sasa hawawezi kuona  athari tunazozisema, mwisho wa siku ndipo watajua ubaya wakutokufikia maridhiano,”alisema Polepole.
Polepole alisema hana uhakika wa kupatikana na kwa katiba mpya kutokana na mchakato unavyo endelea Dkatika Bunge maalum lililogawanyika na kuendelea kukosa maridhiano.
Aliongeza kuwa anashangazwa na watu wanaojadili kuhusu takwimu za namba zilizokusanywa na tume bila kusahau  kuwa  wao kama tume ilikuwa sio kazi yao kuwafuata watu katika nyumba zao na kuwauliza kwanini hawatoki kutoa maoni yao.
“Waliokuwa wanaita watu waende kwenye mikutano ya tume ni viongozi wa serikali wa kata na mitaa, sasa nashangaa mtu kuuliza  kwanini Dar es Salaam kwenye watu wengi  maoni ni madogo kuliko Tabora, hivi unaweza kuuliza mtu ambaye hayupo katika mkutano?” alihoji.
Aidha, alisema kuwa kauli zinazotolewa kuwa Rais hana mamlaka ya kuzuia kuendelea kwa Bunge Maalum la Katiba ni kupotosha umma.
Alisema sheria ya Mabadiliko ya Katiba inatoa mamlaka ya Rais kuteua na kutengua uteuzi kwa hiyo bado ana uwezo wa kutumia busara za kunusuru fedha za Watanzania.

SOURCE: NIPASHE