POLISI WAPIGA MSASA DAWATI LA JINSIA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

JESHI la Polisi mkoani Dodoma, limeendesha semina ya mafunzo maalumu wilayani Kongwa, kwa askari wanaofanyakazi Dawati la Jinsia na Watoto juu ya namna sahihi ya kushughulikia makosa yote ya ukatili wa kijinsia na unyanyasaji wa watoto katika jamii.

Akifungua mafunzo hayo ya siku tano kwa askari Polisi pamoja na wadau wa Jeshi hilo, Mwenyekiti wa Halmashauri ya Wilaya ya Kongwa, White Zuberi, aliwataka washiriki wa mafunzo hayo kuhakikisha wanayatumia vyema kwa kuongeza ujuzi, maarifa pamoja na ufanisi katika kukabiliana na vitendo vyote vya ukatili vinavyofanywa na baadhi ya watu katika jamii.

Alisema lengo la uendeshwaji wa mafunzo hayo, ni pamoja na kuwajengea uwezo wa kuzifahamu vema sheria za kitaifa na kimataifa, ikiwa pamoja na kujifunza kanuni mbalimbali zitakazosaidia kufanya kazi kwa weledi katika kutoa huduma bora kwa jamii pamoja na kwa waathiriwa wa ukatili wa kijinsia na unyanyasaji wa watoto.

Kwa upande wake, Mkuu wa Upelelezi wa Wilaya ya Kongwa, Mrakibu Msaidizi wa Polisi (ASP), Majaliwa Tilibuzya, alisema kuwa katika kipindi cha Januari hadi Juni 2013, makosa 102 yakiwamo ya ubakaji, kipigo, kushambulia pamoja na makosa ya ukeketaji, yaliripotiwa kituo cha Polisi, ambako pia kipindi cha 2014, kuanzia Januari hadi Juni, makosa 82 ya aina hiyo hiyo yaliripotiwa na kufanya tofauti ya kupungua kwa makosa 20 tofauti na mwaka uliopita.

Chanzo:Tanzania Daima