SITTA AMALIZA UTATA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

MWENYEKITI wa Bunge Maalumu la Katiba, Bw. Samuel Sitta, amesema Bunge hilo limefanya mabadiliko madogo ya kanuni ili kuziboresha zaidi ziweze kukidhi matakwa ya kisheria hususan muda walioongezewa ili kukamilisha kazi yao.

Bw. Sitta aliyasema hayo juzi Mjini Dodoma baada ya kukutana na ujumbe wa Bodi ya Jukwaa la Katiba ukiongozwa na Mwenyekiti wao, Bw. Desus Kibamba uliofika ofisini kwake kujua hatua ambayo imefikiwa na Bunge hilo katika kutengeneza Katiba Mpya.

“Tunashangaa baadhi ya watu wanatusakama na kudai tumebadili kanuni ili kuchakachua mchakato huu, naomba ieleweke wazi kuwa tunafanya kazi kwa kuzingatia matakwa ya kisheria na kanuni zilizofanyiwa marekebisho.

“Lengo ni kwenda na muda uliopo ili tuweze kutekeleza kazi yetu kwa muda uliotengwa...hivi sasa mabadiliko yaliyofanywa kwenye kanuni yanatoa fursa kwa Bunge hili kumaliza muda wake ndani ya kipindi cha siku 60 tulizoongezewa na Rais,” alisema.

Aliongeza kuwa, kanuni za awali zilitoa fursa ya mjadala huo kuwa mrefu zaidi katika kujadili sura moja hadi nyingine.

Akizungumzia mwenendo wa Kamati, Bw. Sitta aliwahakikishia wajumbe hao kuwa si kweli kuwa Bunge hilo linajadili rasimu mbadala kama inavyoelezwa na baadhi ya watu.

Alisema kazi inayofanywa na Bunge hilo ni kuendelea kujadili Rasimu ya Katiba iliyopendekezwa na iliyokuwa Tume ya Mabadiliko ya Katiba na Mwenyekiti wake, Jaji mstaafu Joseph Warioba si vinginevyo.

“Kimsingi jukumu la kutunga Katiba ni la Bunge Maalumu, kazi hii inaendelea kama kawaida kulingana na matakwa ya kisheria jinsi yanavyoainisha Bunge hili kufanya hivyo,” alisema.

Masuala ya Muungano

Bw. Sitta alifafanua kuhusu aina ya Muungano unaohitajika katika Katiba Mpya akisema suala la Muungano wa Tanganyika na Zanzibar si la kisiasa tu bali ni la damu kwani makabila mengi yaliyopo Bara na Zanzibar, yapo tangu enzi hizo na hivi sasa kizazi kilichopo ni cha undugu zaidi hivyo kuleta siasa kwenye suala la Muungano wa aina hii ni kuhatarisha mahusiano ya watu hao.

“Agenda yetu si suala la kuwa na Serikali ngapi au muundo wa namna gani bali ni kwa namna gani masuala yote yanayogusa wananchi moja kwa moja yanapatiwa ufumbuzi kupitia Katiba hii mfano, wajibu, haki za raia na makundi mbalimbali,” alisema.

Alisema rasimu iliyopo imetoa fursa ya kutambulika kwa baadhi ya masuala kama haki za wakulima, wafugaji, wavuvi hivyo katika ngaziya kamati, mapendekezo hayo yanaendelea kuboreshwa ili kila kundi liweze kuwekewa mipaka yake vizuri.

Mapema akitoa maoni ya Jukwaa hilo, Bw. Kibamba, alisema awali walipata tabu sana kuamini kama Bunge hilo lingeweza kuendelea kutokana na mvutano uliopo na kundi la UKAWA lakini kutokana na maelezo waliyoyapata kutoka kwa wajumbe na baadhi ya wenyeviti wa kamati ni dhahiri kazi hyo itafanikiwa.

Bw. Kibamba alishauri kuwepo kwa mazingira ya kuvumiliana kwa kila pande zinazovutana ili kunusuru jamii inayowazunguka kuathirika na mivutano hiyo kwa kuwa nao wanaibeba kama ilivyo.

“Tunaomba sana muendelee kuwa na uvumilivu katika mchakato huu, mnapogombana ndani ya Bunge hili, wananchi nao wanajigawa katika makundi na wao kugombana kutokana na tofauti za itikadi...hii inatupa shida hata sisi kuendelea kutoa elimu kuhusu Katiba kwa sababu Taifa nalo linajigawa,” alisema Bw. Kibamba.

Aliwashauri wajumbe wa Bunge hilo kutoka UKAWA na CCM, kuvumiliana na kumaliza tofauti zao ili wananchi waweze kupata Katiba mapema badala ya kuendelea kukosa uvumilivu.

Chanzo;Majira