UNYAMAINYEGE KATA YA KIBAKWE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WATOTO wawili wa Kijiji cha Iyenge Kata ya Kibakwe wilayani Mpwapwa Mkoa wa Dodoma, wa kwanza akiwa na umri wa miaka 17 na mwingine mwenye miaka 16 (majina tunayo) wamefikishwa mahakamani kwa tuhuma za kuwalazimisha watoto wenzao kufanya mapenzi na mbwa ikiwemo kula kinyesi cha binadamu.

Akiwasomea mashtaka yanayowakabili mbele ya Hakimu Mfawidhi wa Mahakama ya Wilaya ya Mpwapwa, Jemsi Kareimaya, Mwendesha Mashtaka wa Polisi, Michael Joseph alisema kuwa, watoto hao walifanya kosa hilo katika Kijiji cha Iyenge Julai 27, mwaka huu.

Alidai, watoto hao ambao ni watuhumiwa waliwalazimisha watoto wanne wa familia moja kufanya mapenzi na mnyama ambaye ni mbwa.

Mwendesha Mashtaka wa Polisi alidai, watoto hao waliofanyiwa ukatili huo ni wa familia moja ambao mmoja ana miaka 14, mwingine 11 wa tatu ana 10 na wa mwisho na 7.

Hata hivyo, watoto hao walikanusha shtaka hilo na kesi yao imeahirishwa kufuatia kutokamilika kwa upelelezi wa polisi na itatajwa tena Agosti 18, mwaka huu.

Wakati huo huo, kutoka Songea Jeshi la Polisi mkoani Ruvuma, linamshikilia mtoto mwenye umri wa miaka 15 (jina tunalo) mkazi wa Makambi katika Manispaa ya Songea mkoani Ruvuma kwa kosa la kuwalawiti watoto sita wa kiume wenye umri chini ya miaka 10 ambao majina yao yamehifadhiwa.

Akizungumza na waandishi wa habari jana ofisini kwake, Kamanda wa Polisi Mkoa wa Ruvuma Kamishna Msaidizi wa Polisi, Mihayo Msikhela alisema kuwa, tukio hilo lilitokea kwa nyakati tofauti kati ya Julai 30 na Agosti 3, mwaka huu majira ya saa 8 mchana.

Kamanda huyo, alisema watoto hao watano ni wanafunzi wa Shule ya Msingi Majimaji na mmoja ni mwanafunzi wa shule binafsi ya Skill Path zote za Manispaa ya Songea ambapo wazazi wa watoto hao walibaini kuingiliwa kwa watoto wao na kutoa taarifa kituo kikubwa cha polisi cha mjini Songea.

Kamanda Msikhela alisema, mtoto huyo ambaye ni mtuhumiwa huyo alikuwa akiwadanganya watoto kwa kuwapa sh.100 au miwa aliyokuwa akiuza karibu na nyumba chakavu aliyokuwa akifanyia kitendo hicho cha kuwalawiti watoto.

Aliongeza kuwa, mtuhumiwa amekuwa akiwatishia watoto hao kwa fimbo au tofali ili wasiweze kusema kitendo hicho hivyo kufanya kuwa siri hadi Agosti 3, mwaka huu wakati mmoja wa wazazi alipomkuta mtoto wake ana kinyesi ndani ya kaptula.

Kamanda huyo alisema, mzazi baada ya kumbana mtoto huyo alisema ukweli na kuwataja wenzake waliolawitiwa na kumtaja mtuhumiwa wa kitendo hicho.

Aidha, Kamanda alisema mtuhumiwa amekamatwa na amekiri kufanya kitendo hicho na atafikishwa mahakamani kujibu tuhuma hizo.

Pia Kamanda huyo, ametoa wito kwa wazazi na walimu kujenga tabia ya kuwatazama watoto wao pindi wanapoenda na kutoka shule kwani jukumu la kuwalea watoto ni letu sote.

Kwa upande wake Kaimu Mganga Mfawidhi Hospitali ya Rufaa Songea, Lucy Ngoi amethibitisha kuwepo kwa tukio hilo na watoto wanaendelea na vipimo kubaini kama kuna magonjwa wameambukizwa

 Chanzo:Majira