WAHUJUMU KILIMO KUKIONA

na Tamali Vullu, Dodoma

SERIKALI imetangaza vita dhidi ya wahujumu katika sekta ya kilimo nchini ambapo Waziri wa Kilimo, Chakula na Ushirika, Mhandisi Christopher Chiza, alisema wataendelea kuwalinda wakulima kwa gharama yoyote.

Akisoma kauli ya serikali bungeni jana kuhusu utaratibu wa ruzuku ya pembejeo kwa wakulima kwa mwaka 2012/2013, Chiza alisema kuwa serikali imewaomba wadau wote wa kilimo wakiwemo watendaji kuchukia na kupiga vita mfumo uliojengeka wa kuwaibia wakulima.

Alisema kuanzia mwaka huu wa fedha serikali inatarajia kutoa pembejeo kwa utaratibu wa mkopo na kwamba mamlaka za kilimo zinapaswa kupewa uwezo wa kufungia biashara ya pembejeo feki bila ya kusubiri taratibu za mahakama za mashtaka na hukumu kama ilivyo kwa makosa ya trafiki.

Chiza alifafanua kuwa katika mwaka huu wa fedha, serikali imetenga sh bilioni 75.1 zitakazoweza kuwafikia wakulima milioni moja kupitia mfumo wa ruzuku na kwamba kwa mwaka uliomalizika, sh bilioni 119.6 zilitengwa kupitia mfumo huo na kuwafikia wakulima 1,800,000.

Waziri Chiza alisema katika mwaka huu wa fedha, serikali itaendelea kutoa ruzuku ya pembejeo kwa mazo ya mahindi, mpunga, mtama, alizeti, miche bora ya chai na kahawa, mbegu za pamba na viuatilifu kwa mazao ya pamba na korosho.

Chanzo: Tanzania Daima