Mapendekezo ya CCM yakwama kwenye kamati

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Mapendekezo ya CCM ya kutaka kufanya marekebisho katika baadhi ya vifungu katika Ibara ya 1 ya Rasimu ya Katiba yamegonga mwamba baada ya kukosa theluthi mbili ya kura kutoka Zanzibar.

Hali hiyo imejitokeza katika kamati tatu kati ya 12 ambazo zimeanza kutoa matokeo ya kura baada ya mjadala.

Wakitoa taarifa kwa waandishi wa habari, mwenyeviti wa Kamati Namba 1, Ummy Mwalimu na Namba 10, Anna Abdallah, walisema kuwa theluthi mbili imekosekana katika baadhi ya vifungu kwenye ibara hiyo.

Walisema kwamba vipengele vilivyokosa theluthi mbili ya kura zilizopigwa, vitapelekwa bungeni pamoja na hoja zilizotolewa na wengi na wachache. Abdallah alisema ibara nyingi walizozipigia kura katika kamati yake hazikupata theluthi mbili ya kura.

“Kwa mfano muundo wa serikali kwa vyovyote vile hatupati theluthi mbili, ila tunapata walio wengi wanataka nini. Walio wengi wanataka mfumo wa serikali mbili, kwa hiyo taarifa yetu itakuwa na maoni ya wajumbe wengi, na ile wachache,” alisema Anna.

Alikiri kuna wajumbe wachache ambao wanataka muundo wa shirikisho la serikali tatu, lakini hawawezi kusema hao ndio wameshinda.

Alitolea mfano wa ibara ya pili ya sura ya kwanza ambayo inazungumzia mipaka ya Jamhuri ya Muungano wa Tanzania ambayo waliafikiana kuongeza milima na anga.

Alisema kuwa ibara hiyo ilikubaliwa na wajumbe wote baada ya kuongezwa maeneo hayo mawili.

“Maeneo yenye utata ikiwamo kwenye muundo wa serikali ndio tumeshindwa kupata theluthi mbili ya kura zilizopigwa na wajumbe kutoka pande mbili za Muungano,” alisema.

Naye  Mwalimu alisema ibara ya 1 katika sura ya kwanza hawakupata theluthi mbili pande zote mbili.

Alisema uamuzi huo si wa mwisho, bado watakwenda katika Bunge la Katiba kupigiwa kura za jumla.

Pamoja na kamati nyingine kuendelea kupiga kura, habari za ndani zinasema upatikanaji wa theluthi mbili katika ibara hiyo ya kwanza umekuwa mgumu.

Akizungumzia hali hiyo, mjumbe wa Bunge hilo, Zitto Kabwe alisema kushindwa kuungwa mkono kwa mapendekezo hayo, maana yake ni kwamba vifungu vinabaki  kama vilivyowasilishwa na Tume ya Mabadiliko ya Katiba.

“Kukosa theluthi mbili inaweza kuwa na maana kubwa kuwa mapendekezo ya Tume yanabaki kama yalivyo,” alisema Zitto.

Naye John Mnyika alisema hatua hiyo inamaanisha kuwa uchakachuaji wa Rasimu ya Katiba umeshindwa.

“Taifa livute subira kwenye kura hizi za awali, kwani kura zitapigwa tena bungeni, lakini ni muhimu wananchi wafuatilie kwa makini yanayojiri katika kamati licha ya vikwazo vilivyowekwa kwa vyombo vya habari,” alisema Mnyika.

Hata hivyo, kukosekana kwa theluthi mbili ya kura katika kamati kunadaiwa kuchangiwa pia na utoro wa wabunge wengi wa CCM katika vikao vya kamati.

Kwa mujibu wa Sheria ya Mabadiliko ya Katiba, ili iweze kupitishwa na Bunge itahitaji kuungwa mkono kwa wingi wa theluthi mbili kutoka Tanzania Bara na theluthi mbili ya idadi ya wajumbe kutoka Zanzibar.

Sitta atembelea kamati

Wakati huohuo, mwenyekiti wa Bunge la Katiba, Samuel Sitta juzi alizunguka katika kamati zote 12 kuona mwenendo wa shughuli na alipata maoni kutoka kwa baadhi ya kamati kuhusu mazingira ya kazi.

Alisema baadhi ya kamati zilimwambia kuwa kumbi ni ndogo na kwamba jana waliamua kubadili baadhi ya sehemu za kufanyia vikao hivyo.

“Kwa mfano, ukumbi wa kamati namba 5 uliopo ghorofa ya tano ni mdogo sana. Mimi nilikaa pale nikaanza kutoka jasho, sasa kukaa pale kwa siku nzima ni tatizo kwa kweli,” alisema.

Alisema Kamati Namba 5 sasa imehamishiwa katika Hoteli ya St. Gasper.
Chanzo;Mwananchi