MAHAKAMA YA KADHI YAWAGAWA WABUNGE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

MAHAKAMA ya Kadhi imetikisa mjadala wa Bunge Maalumu la Katiba jana. Hali hiyo inatokana na ukweli kuwa idadi kubwa ya wajumbe ambao walipata fursa ya kuchangia waliendelea kuwashawishi wenzao wakubali mahakama hiyo iingizwe kwenye Katiba kwani ni chombo muhimu kwa waumini wa dini ya Kiislamu.

Hata hivyo wapo wajumbe waliopinga hoja hiyo kwa madai kuwa mambo ya kidini hayafai kuchanganywa na utendaji wa kila siku wa Serikali.

Baadhi ya wajumbe walisema kutoiweka mahakama hiyo kwenye Katiba ni kuendelea kuwanyima haki waumini wa dini hiyo ambao wanaitegemea kushughulikia mambo yao ya ndoa, talaka, mirathi na amana.

Mjumbe kutoka Zanzibar, Juma Suluhu alisisitiza Mahakama ya Kadhi iwepo kutatua migogoro ya Kiislamu na akasema kwa kuwa Zanzibar inaendesha Mahakama hivyo vizuri haoni sababu kwa nini isiwepo kwenye Katiba ya Muungano. Shamin Khan alitoa mfano wa Kenya na Uganda na kusema wameiweka mahakama hiyo kwenye Katiba.

Alihoji, “Tanzania inapata kigugumizi gani?” “Naomba suala hili lisizimwe, Katiba ndio sheria mama mambo ya kueleza kuwa litawekwa kwenye sheria ni kutuhadaa maana lisipoonekana kwenye Katiba tumezikwa,” alisema Khan.

Mjumbe Jasson Rweikiza alisema kitendo cha kuiweka mahakama hiyo kwenye Katiba ni makosa makubwa na akashauri waachiwe waumini wa dini hiyo washughulike nalo wenyewe.

Sheikh Hamid Jongo alisema Waislamu wanaomba Katiba itamke kuwa kutakuwa na Mahakama ya Kadhi na akasema kudai haki hiyo sio kwamba wanaitaka Mahakama igharimie shughuli zake bali wanataka itambulike kisheria.

Alisema kama vile ambavyo Waislamu hawaombi kugharimiwa gharama za kwenda hija, vivyo hivyo hawataiomba Mahakama kugharimia mahakama hiyo, badala yake watakachofanya ni kutaka itambulike kisheria.

Mbwana Salum Mbana alisema umefika wakati Watanzania wavumiliane kiimani na moja ya uvumilivu huo ni kuona mahakama hiyo inaingia kwenye Katiba na akaeleza kuwa kuruhusu suala hilo ndiko kutakakodhihirisha kuwa upo uvumilivu kiimani.

Lakini Ave Maria Semakafu alipinga hoja hiyo na kueleza kuwa dini zote zina ibada zake na zina taratibu zake za kusimamia masuala ya ndoa, hivyo kuruhusu kuwepo kwa Mahakama ya Kadhi ni kuruhusu madhehebu mengine pia yadai taratibu zao ziingizwe kwenye Serikali.

Zainab Gama alisema Waislamu wanalia kwamba sheria kwa sasa haitambui mahakama za kadhi zilizopo na hata zinapofanya uamuzi wanapoenda mahakama za juu, hautambuliki kisheria.

Chanzo;Habari Leo