OFISI YA MSAJILI YASUKWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WAJUMBE wa Bunge la Katiba, wamezifanyia maboresho makubwa Ibara za 197, 198 na 119 za sehemu ya tatu ya Sura ya 12 ya Rasimu ya Katiba kuhusu usajili na usimamizi wa vyama vya siasa, wakitaka Msajili wa Vyama vya Siasa apewe uwezo wa kufuta chama cha siasa kinachokiuka masharti ya usajili wa vyama vya siasa.

Mapendekezo hayo, yamo kwenye taarifa ya Kamati namba kumi, ambapo wajumbe walio wengi wanapendekeza ibara ya 199 (1) inayoeleza wajibu wa Msajili wa Vyama vya Siasa, iongezwe aya mpya ya (b) inayotoa uwezo huo.

Kamati hiyo pamoja nyingine nyingi, zinapendekeza iongezwe ibara mpya itayoanzisha nafasi, uteuzi na majukumu ya Naibu Msajili wa Vyama vya Siasa ambayo itasomeka; “Kutakuwa na Naibu Msajili wa Vyama vya Siasa atakayeteuliwa na Rais baada ya kupendekezwa na Tume ya Utumishi wa Umma”.

Lengo la pendekezo hilo ni kutoa uwiano kwa pande mbili za Muungano ili endapo Msajili wa vyama vya siasa atateuliwa kutoka Tanzania Bara, Naibu Msajili attoke Zanzibar.

Katika kusimamia vizuri fedha za Umma zinazotolewa kwa vyama vya siasa kama ruzuku, Kamati namba nane imependekeza Ibara ya 199.- (1) (b) iboreshwe katika majukumu ya Msajili kwa kuongezea maneno “kinachopata ruzuku kutoka serikalini ni kama ilivyo katika sheria”.

Pia wanapendekeza kiongezwe kifungu (d) ili msajili awe na jukumu la kutatua migogoro ya vyama vya siasa, kufanya ukaguzi wa uhai wa vyama na kuelimisha jamii

Chanzo:Tanzania Daima