MAANDALIZI YA KUKABIDHI KATIBA KWA JK YAKAMILIKA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Katibu Mkuu wa Chadema, Dk. Willibrod Slaa

Wakati Maandalizi ya kuwakabidhi Rais Jakaya Kikwete na Rais wa Zanzibar, Dk. Ali Mohamed Shein Katiba inayopendekezwa, leo mjini Dodoma, vyama vinavyounda Umoja wa Katiba ya Wananchi (Ukawa), vimesema havitashiriki tukio hilo kwa madai kuwa maoni ya wananchi yamechakachuliwa.

Vyama hivyo ni Chadema, CUF na NCCR-Mageuzi.Katibu Mkuu wa Chadema, Dk. Willibrod Slaa (pichani), alisema wao hawatashiriki kwa madai ya kwamba mawazo ya wananchi yaliyokuwamo kwenye Rasimu ya Katiba iliyowasilishwa na iliyokuwa Tume ya Mabadiliko ya Katiba, yalichakachuliwa.

 “Sisi Chadema hatutashiriki kwa sababu mawazo ya wananchi yamechakachuliwa. Makundi mbalimbali kama vile ya wakulima, wafugaji yamekuwa yakichukuliwa kwa makundi  na kuambiwa wakubaliane na katiba iliyopendekezwa. Wananchi hao hawana uelewa wa kutosha, hivyo wanaamini kiongozi wao anachokisema hata kama ni uongo. Tunafanya usanii, sisi Chadema hatuko tayari kushiriki usanii huo.”

Mwenyekiti wa NCCR-Mageuzi, James Mbatia, alisema hawezi kusema chochote kuhusu makabidhiano hayo, kwa kuwa hawajapewa mwaliko wowote.

Kwa mujibu wa Mbatia, ofisi yake ingepewa mwaliko wa kuhudhuria tukio hilo, angeweza kujua kitu gani kilichomo kwenye barua na hivyo kuweza kusema chochote  kuhusu tukio hilo linalotarajia kufanyika leo katika Uwanja wa Jamhuri,  mjini Dodoma.

“Hatujaalikwa. Mimi kama mwenyekiti wa chama, ningepata mwaliko, ningeona maudhui na kujua la kusema. Sasa nitawezaje kusema, ikiwa hatujaalikwa na maudhui siyajui?” Alihoji Mbatia.

Hata hivyo, alisema, wao hawawezi kujihusisha kwenye tukio ambalo halina maridhiano kwa madai ya kwamba, dola inaendeshwa kwa maridhiano huku akionyesha kusikitishwa na hatua iliyofikiwa na BMK ya kuwatukana viongozi wa dini wakati zoezi la mwisho la kuipigia kura katiba hiyo iliyopendekezwa na bunge hilo wiki iliyopita.

 “Nchi bado haijakaa vizuri, nami siwezi kushiriki kupokea katiba inayounganisha nchi ya namna hiyo. Hivyo namshauri Rais, leo azungumze namna ya kuliunganisha taifa.”

Kaimu Naibu Katibu Mkuu wa CUF, Joran Bashange, alisema, wao walishakataa baada ya kuona mchakato wa upatikanaji wa katiba mpya ulikuwa unaenda kinyume na matakwa ya wananchi.

 “Wamepanga utaratibu wao, sisi tutakubalianaje? Sisi tulikataa kwa sababu tuliona mchakato ulikuwa unaenda kinyume cha matakwa ya wananchi. Hivyo hatuwezi kwenda kubariki uharamia.”

Naye mjumbe wa iliyokuwa Tume ya Mabadiliko ya Katiba (TMK), Prof. Mwesiga Baregu, alishauri tukio la kukabidhi katiba inayopendekezwa, lifanyike kimya kimya.

“Ninasikia kuwa kuna maandalizi ya sherehe za kukabidhi Katiba hiyo yanayoambatana na nyimbo mpya zilizoandaliwa kwa ajili ya kuimbwa kwenye tukio...mimi nashauri makabidhiano yafanyike kimya kimya,” alisema Prof. Baregu na kuongeza:

“Ninashauri hivyo kwa sababu kwa sasa inaonekana kwamba hatua ya kupitisha katiba hiyo imekuwa kama ni ushindi kwa wale walioipitisha na kumbe sivyo.”

“Watanzania wanataka Katiba inayowaunganisha na siyo inayowatengenisha, hivyo kuruhusu sherehe kwenye makabidhiano hayo ni kuendeleza msuguano miongoni mwa makundi yanayopingana kuhusu katiba hiyo," alisema.

Prof. Baregu alisema kuwa cha msingi ambacho kilikuwa kinatakiwa ni maridhiano ili kupata kile wananchi wanakihitaji, hivyo kushangilia ama kusherehekea bila kuwa na maridhiano ni kuongeza mpasuko kwenye jamii.

Mkuu wa Mkoa wa Dodoma, Dk. Rehema Nchimbi, alisema hadi jana mchana, tayari mazingira ya uwanja wa Jamhuri yalikuwa tayari yameshaandaliwa.

Hata hivyo alipoombwa kutaja majina ya viongozi wakuu waliothibitisha kuhudhuria sherehe hizo, Dk. Nchimbi alisema orodha ipo kwa Katibu wa BMK kwani wao ndiyo wanaoratibu shughuli hiyo.

Kwa mujibu wa tarifa za awali zilizopatikana kutoka kwa ofisa mmoja wa serikali, sherehe hizo zinatarajiwa kuhuduriwa na wageni takribani 3,000.

Kamanda wa Polisi mkoani hapa, David Misime, alisema wamejiimarisha kiulinzi na kwamba kutakuwa na doria katika maeneo mbalimbali  yakiwamo ya mjini.

“Tunafuatilia taarifa mbalimbali kwa ajili ya kuimarisha usalama, vijana wa kufanya doria kwa miguu, farasi, pikipiki na magari wapo muda wote kuanzia sasa,” alisema Kamishna Misime.

CHANZO: NIPASHE