JESHI LA POLISI DODOMA LAWAKAMATA WAGANGA WA KIENYEJI‏

Kiongozi wa kundi la waganga wa kienyeji maarufu kama Lambalamba

Majuto Muhamedi akielezea jinsi wanavyofanya kazi ya kutoa uchawi

kwenye nyumba mbalimbali mbele ya waandishi wa habari baada ya

kukamatwa na jeshi la Polisi mkoani Dodoma kutokana na kufanya

shughuli hizo ambapo kundi hilo ni mchanganyiko wa waganya kutoka

mikoa Tanga,Morogoro,Mtwara na Pwani,Picha na Masoud Masasi

Kamanda wa Polisi Mkoani Dodoma Zelothe Stephen akiwaonyesha waandishi

wa habari kifaa kinachojulikana kama sitemila ambacho utumiwa na

kundi la waganga wakienyeji maarufu kama Lambalamba kwa kushughuli zao

za kuwakamata wachawi ambapo jeshi hilo limewakamata waganga hao saba

kutokana na kuendesha shughuli hizo ambazo zimekuwa zikileta ufunjifu

wa amani kwa wananchi kutokana na imani za kishirikina,kulia kwake ni

kiongozi wa kundi hilo Majuto Muhamedi Picha na Masoud Masasi.

**********************

Masoud Masasi,Dodoma yetu

JESHI la Polisi mkoani Dodoma linawashikiria watu tisa wanaodaiwa kuwa

ni waganga wa kienyeji maarufu kama Lambalamba ambao wamekuwa

wakiwalaghai wananchi kwa kufanya shughuli za kutoa watu uchawi na

kusababisha kuwepo kwa uvunjifu wa amani.

Pamoja na kukamatwa kwa watu hao Jeshi hilo mkoani hapa limepiga

marufuku shughuli zote za uganga wa kienyeji ambapo wameunda kikosi

maalumu cha kufanya operesheni mkoa mzima.

Akizungumza na waandishi wa habari jana mjini hapa kamanda wa Polisi

mkoa wa Dodoma Zelothe Stephen alisema kundi hilo la matapeli wamekuwa

wakijishughulisha na shughuli za kitapeli kwa kujifanya waganga wa

kienyeji kinyume na sheria ya nchi.

Aliwataja waganga hao waliokamatwa kuwa ni Musa Omari(19) Abdallah

Musa wote ni wakazi wa mkoa ni Mtwara,Ally Shante(30) mkazi wa Kibaha,

Shabani Ramadhani(32) na majuto Mohamedi (32)kutoka Morogoro,Abdalah

Musa(16) na salehe Omari(26) na Mkude Mwenda na Joseph John wote

kutoka Tanga

Zelothe alisema watu hao ambao wanajulikana kwa jina la lambalamba

walikuwa wakifanya utapeli huo katika wilaya ya Kongwa kwa kuwatoa

uchawi watu mbalimbali jambo alilosema limekuwa likichochea chuki na

uadui kwa wananchi.

Alisema kukamatwa kwa watuhumiwa hao kunatokana na operesheni

iliyofanya na jeshi hilo kutokana na watu hao kufanya shughuli hizo

ambazo zimekuwa zikihatarisha amani kwa kuwagombanisha wananchi.

Alibainisha kuwa hivi karibuni kundi hilo lilileta vurugu baada ya

kutokea kwa kifo cha Martha Mapuga(34)mkazi wa kijiji cha Mlanje baada

ya baba yake Meshack Mapugakuwakatalia waganga hao kufanya shughuli

hizo nyumbani kwake.

Alisema baada ya waganga hao kuondoka ndipo Martha aliugua ghafla

alianza kuumwa tumbo ambapo alifariki wakati akiwa katika hospitali

ya wilaya ya Kongwa.

“Kutokana na sintofahamu ya wanakijiji hao walianza kuwatilia mashaka

kikundi hicho cha lambalamba hao walihusika na tukio hilo ndipo ndipo

walipojikusanya wakiwa na silaha za jadi kwa lengo la kutaka kuwaua

lakini walifanikiwa kuvunja mlango na kutoroka ”alisema Zelothe.

Kamanda huyo alisema kundi hilo limekuwa likisababisha watu kuuwawa na

wengine kuchomewa nyumba zao kutokana na kuwataja watu wachawi ambao

wamekuwa wakiroga watu mbalimbali.

Alisema kuanzia sasa jeshi hilo limepiga marufuku shughuli zote za

uganga wa kienyeji ambapo amesema wameunda kikosi maalumu ambacho

kitakuwa kikifanya operesheni ya kuwakamata watu wote

wanaojishughulisha na shughuli hizo.

“Kuanzia sasa sitaki kuona wala kusikia sijui mganga katoka sumbawanga

wala wapi tumeunda kikosi maalumu kwa ajili ya kushughulika nao na pia

wananchi muwe mnatupa taarifa za hawa watu na sisi tutawakamata kwa

kuwa wanachokifanya ni uvunjifu wa amani”alisema Kamanda huyo.

Kwa upande wao mmoja wa waganga hao waliokamatwa Majuto Muhamedi

alisema wamekuwa wakifanya shughuli hizo za kutoa uchawi sehemu

mbalimbali hapa nchini kwa mwaliko maalumu wa viongozi wa vijini na

kata.

“Kama kuna tatizo eneo husika la kuwepo kwa vitu kama pembe,mizukule

na mtu ambaye anafahamika kwa uchawi basi huwa tunaitwa kwa mwaliko

maalumu kutoka kwa viongozi wa kijiji na sisi tunakwenda kufanya kazi

hiyo na wakati mwingine tunatoa hadi fisi na nyoka kwenye nyumba

mbalimbali”alisema Mohamedi.