Mbunge ataka CDA ivunjwe

MBUNGE wa Dodoma Mjini, David Malole (CCM), amemuomba Rais Jakaya Kikwete kuifumua Mamlaka ya Ustawishaji Makao Makuu (CDA) kwa  madai kuwa ni chanzo cha migogoro ya ardhi katika Halmashauri ya Dodoma. Mbali na hilo, alisema kuwa yeye hawezi kuendelea kuwa mjumbe wa bodi ya CDA ambayo kimsingi haijali haki za binadamu na inafanya kazi bila kujali utu wa mtu ndiyo maana imekuwa ikibomoa nyumba za wananchi bila majadiliano. Akizungumza na Tanzania Daima Jumatano katika viwanja vya Bunge mjini hapa, Malole alisema ni bora kuifuta mamlaka hiyo na kutafuta njia mbadala kuliko kuendelea kuwatesa wananchi wasiokuwa na hatia. Mbunge huyo pia alihoji ni wapi viongozi wa mamlaka hiyo wanapata jeuri ya kuwanyanyasa wananchi kwa kuwabomolea nyumba zao kwa madai kuwa watu hao ni wavamizi. “CDA imekuwa mwiba kwa wakazi wa Halmashauri ya Dodoma kwani wananchi wengi kwa sasa wanaishi kwa shaka na wengine hawawezi kujenga nyumba bora kutokana na hofu ya kubomolewa nyumba zao. “Kibaya zaidi viwanja vinavyouzwa na CDA vinauzwa kwa bei ya juu ambapo wananchi hawawezi kununua kwa wepesi na hiyo kama haitoshi inakuwaje mtu anajenga mpaka anamaliza anaanza kuishi, leo unamwambia ni mvamizi? Ina maana kitengo cha ukaguzi wa mazingira hakipo na kama kipo wanalipwa mshahara wa nini?” alihoji Malole. Mbunge huyo alitolea mfano wa wakazi wa Kikuyu ambao walilazimika kurudisha kadi za CCM kwa madai kuwa serikali haiwajali na ndiyo maana inabomoa nyumba zao licha ya kuwa na sera ya maisha bora kwa kila Mtanzania. Akijibu tuhuma hizo, Kaimu Mkurugenzi wa CDA, Paskasi Mulagili, alisema kwa mujibu wa kanuni na taratibu na sheria, CDA inajipanga kubomoa maeneo yote ambayo yamejengwa kiholela na kuvamiwa kinyume na taratibu. Akizungumzia suala la mbunge kujiondoa kwenye bodi kwa madai kuwa CDA ni chanzo cha migogoro, alimtaka kutoa hoja binafsi bungeni kwa ajili ya kulishawishi Bunge kuvunja CDA na si vinginevyo. chanzo;tanzania daima