Serikali yazidi kuiwekea ngumu Tume ya Warioba

 

Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi, akiwasilisha kauli ya serikali Bungeni Dodoma jana kuhusu taarifa ya awali ya Tume ya Taifa ya kuchunguza matokeo ya mtihani wa taifa wa Kidato cha nne wa mwaka 2012. 

Serikali imeendelea kushikilia msimamo wake wa kutaka Tume ya Mabadiliko ya Katiba ivunjwe mara baada ya kukamilisha rasimu ya pili ya Katiba Mpya na kuikabidhi kwa Bunge Maalumu kwa ajili ya kujadiliwa, Mwananchi limebaini.

Habari ambazo zimelifikia gazeti hili zinasema, suala la ukomo wa tume hiyo inayoongozwa na Jaji Mstaafu Joseph Warioba ndilo lililochukua sehemu kubwa ya mjadala katika vikao vya majadiliano baina ya Serikali na vyama vyenye wabunge vinavyokutanishwa na Kituo cha Demokrasia Tanzania (TCD).

Majadiliano baina ya pande hizo yalihusu marekebisho yanayopaswa kufanywa katika Sheria ya Marekebisho ya Sheria ya Mabadiliko ya Katiba 2013, ambayo ilipitishwa na Bunge katika mkutano wake wa 12 baada ya kuwapo kwa malalamiko kwamba ina kasoro nyingi ambazo zingekwaza upatikanaji wa Katiba bora.

Msimamo huo wa Serikali pia ni kama kupuuza maoni ya Ofisi ya Bunge ikiongozwa na Spika, Anne Makinda ambayo iliwasilisha maoni yake ikikosoa hatua ya kuwekwa kando kwa Tume ya Warioba kwa maelezo kwamba kutokuwepo kwake kutaathiri utekelezaji wa vifungu vingine vya sheria hiyo.

Jumapili iliyopita, Serikali ilifanya mashauriano ya mwisho na wajumbe hao wa vyama katika kikao kilichofanyika Ofisi za Bunge Dodoma, lakini habari zinasema hakukuwa na mwafaka juu ya ukomo wa tume hiyo.

Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi akizungumza na gazeti hili jana alisema Serikali tayari imewasilisha muswada huo katika Ofisi ya Katibu wa Bunge, na kwamba mamlaka ya hatua zinazofuata yapo kwa Spika.

Kadhalika waziri huyo alikiri kuwapo kwa kikao cha mashauriano kuhusu marekebisho ya sheria hiyo, lakini alikataa kuzungumzia msimamo wa Serikali kuhusu suala la Tume ya Warioba.

“Sheria iliyopitishwa na Bunge, kisha kusainiwa na Rais inasimama hadi hapo itakapoamuliwa vinginevyo.”

chanzo;mwananchi