‘BARABARA YA LAMI YA DODOMA HADI IRINGA ITAKUZA UCHUMI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

RAIS Jakaya Kikwete amesema kufunguka kwa barabara kutoka Dodoma hadi Iringa, kutakuza shughuli za kiuchumi na kupunguza umasikini kutokana na barabara hiyo kuwa sehemu ya barabara kuu inayoanzia Cape Town nchini Afrika Kusini kupitia Tanzania hadi Cairo, Misri, maarufu kama The Great North Road.

Alisema hayo jana wakati wa uzinduzi wa barabara ya Dodoma hadi Fufu yenye urefu wa kilomita 70.9. Alisisitiza kuwa uimarishaji wa barabara ni moja ya sera za msingi za Chama Cha Mapinduzi (CCM).

“Umuhimu wake, si tu itaunganisha Dodoma na Iringa au Dodoma na Babati, bali ni kutoka Kusini mwa Afrika, barabara kuu ya kaskazini kutoka Cape Town hadi Cairo nchini Misri,” alisema.

Alisema kufunguka kwa barabara hiyo, pia ni kichocheo kwa ukuaji wa shughuli za kiuchumi na kijamii kati ya Ukanda wa Kusini Nyanda za Juu na mikoa ya Kati na Kaskazini.

Mwakilishi Mkazi wa Benki ya Maendeleo ya Afrika (ADB), Tonia Kandiero alisema barabara hiyo, itasaidia kuboresha maisha ya wananchi, kuongeza kipato na kuimarisha mawasiliano.

Alilishukuru Shirika la Kimataifa la Maendeleo ya Japan (JICA) kwa kuonesha ushirikiano mkubwa wakati wa utekelezaji wa mradi huo.

Pia, alisema sehemu ya barabara ya Dodoma hadi Iringa inaungana na barabara zinazounganisha Tunduma hadi Zambia na Namanga Mpakani mwa Kenya, zinazounga barabara ya Cape Town hadi Cairo.

Alisema hilo litapunguza muda wa safari, kutokana na barabara kuunganishwa kati ya nchi na nchi, jambo ambalo litakuza uchumi. Alitaka serikali kutambua umuhimu wa barabara ili waweze kuchangia.

Mtendaji Mkuu wa Wakala wa Barabara nchini (Tanroads), Patrick Mfugale alisema mradi huo wa barabara, unafadhiliwa kwa pamoja na ADB, Serikali ya Japan kupitia JICA na serikali ya Tanzania, ambapo ADB inatoa asilimia 63.23, JICA asilimia 23.24 na Tanzania inatoa asilimia 13.53.

Alisema ili kuharakisha ujenzi wa barabara hiyo ya Iringa hadi Dodoma, utekelezaji wake unafanywa kwa sehemu tatu na kwa mikataba mitatu, yaani sehemu ya Fufu hadi Dodoma kilomita 70.9, Migori hadi Fufu kilomita 93.8 na Iringa hadi Migori asilimia 95.2.

Alisema jiwe la msingi la barabara hiyo, liliwekwa na Rais Kikwete Mei 22, mwaka 2013 na sehemu hiyo ya Fufu hadi Dodoma imesanifiwa kubeba jumla ya ekseli za magari zipatazo milioni tatu, zenye uzito wa tani nane kila moja katika muda wa miaka 20, endapo magari yanayotumia barabara hiyo haitazidisha uzito unaoruhusiwa.

Alisema ujenzi wa barabara ya Fufu hadi Dodoma, ilikamilika Julai 20 mwaka huu na mradi kwa sasa upo katika kipindi cha uangalizi wa mkandarasi kwa mwaka mmoja hadi Julai 20 mwakani.

Sehemu nyingine zilizobaki za barabara ya Dodoma hadi Iringa, zimekamilika kwa karibu asilimia 90. Waziri wa Ujenzi, Dk John Magufuli alisema bado ujenzi wa kilometa 25 ili barabara yote ya Dodoma hadi Iringa iweze kukamilika.

Chanzo;Habari Leo