HARAKATI MPYA ZAIBUKA DODOMA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Kamanda wa Polisi Mkoa wa Dodoma,David Misime.

Siku moja baada ya Rasimu ya Katiba inayopendekezwa kuwasilishwa ndani ya  Bunge Maalum la Katiba (BMK), watu wasiojulikana wameonyesha hisia zao kwa kuandika maneno yenye ujumbe wa kuipinga Rasimu hiyo katika ukuta wa uzio wa Ofisi ya Makao Makuu ya Chama Cha Mapinduzi (CCM) na Uwanja wa Mpira wa Jamhuri mjini Dodoma, huku pia wakisambaza vipeperushi vyenye ujumbe mzito wa kuwatisha wajumbe wa BMK.
Uchunguzi wa NIPASHE umebaini kuwa, maneno ambayo yaliandikwa kwenye kuta hizo na baadhi ya nyumba katika maeneo mbalimbali mjini hapa yote yanafanana.
Maneno hayo ambayo yaliandikwa kwa wino mwekundu na mweusi, huku yakionekana kukolezwa kwa wino mzito yalisomeka ‘Ufisadi, No Katiba’.
Aidha vipeperushi vyenye ujumbe wa kuwatisha wajumbe wa BMK wanaoendelea na vikao vya Bunge mjini hapa vilisambazwa katika maeneo mbalimbali ya mji wa Dodoma.
Vipeperushi hivyo pia vilikuwa na ujumbe wa aina moja na vilikuwa vikisomeka hivi: ‘Onyo: Dodoma siyo mahali pa kufuga wezi wa fedha za umma, utakayeingia bungeni kuanzia kesho, yatakayokupata utajuta’.
Baadhi ya wananchi mjini Dodoma waliozungumza na NIPASHE kuhusiana na kitendo hicho walisema kuwa, baada ya serikali kutumia nguvu kubwa kuwabana watu kuonyesha hisia zao za kutoridhishwa na mchakato wa Katiba, sasa wameamua kutumia njia nyingine kufikisha ujumbe.
Akizungumzia tukio hilo, Kaimu Katibu wa CCM Mkoa wa Mbeya, Dunga Othuman Omary, alisema kuwa kitendo hicho ni cha uchochezi, hivyo akaviomba vyombo vya dola kuchukua hatua stahiki za kuwasaka, kuwakamata na kuwafikisha mahakamani watu waliofanya kitendo hicho. Alisema kuwa inasikitisha kwamba CCM imeanza kuwa mhanga wa mchakato wa Katiba wakati Katiba mpya siyo mali ya CCM.
“Katiba mpya siyo mali ya CCM na wala siyo mali ya chama chochote cha siasa, hii ni mali ya Watanzania wote, lakini jambo la kusikitisha ni kwamba chama chetu kinaanza kuwa mhanga wa katiba, nadhani huu ni uchochezi na lazima Serikali iwe macho na watu hawa,” alisema Omary.
Alisema kuwa hata yeye ameshuhudia vipeperushi vyenye ujumbe wa vitisho kwa wabunge vikiokotwa katika maeneo mbalimbali mjini Dodoma na kudai kuwa ujumbe huo unashabihiana na dhamira ya maandamano ambayo yalikuwa yakiandaliwa na chama kimoja cha siasa.
“Vipeperushi hivi tumevikuta eneo la Jamhuri (Uwanja wa Mpira wa Jamhuri), kwenye maeneo ya Bunge na Polisi, ujumbe ulio kwenye vipeperushi hivi unashabihiana na dhamira ya maandamano, hivyo huwezi kusema kuwa watu hawa hawajulikani, nadhani ni wajibu tu wa vyombo vya usalama kuwafuatilia ili sheria ichukue mkondo wake,” alisema Omary.
Alisema kitendo hicho ambacho alikiita kuwa siyo cha kawaida, ni kiashiria kimojawapo cha uvunjifu wa amani, hivyo akawataka Watanzania kukikemea na kuchukua hatua ya kuwakataa watu wanaofanya vitendo vya aina hiyo.
Kwa upande wake, Meneja Msaidizi wa Uwanja wa Michezo wa Jamhuri, Said Kalela, aliwataka wanasiasa kufanya siasa zao wakiwa kwenye majukwaa na si kwenye viwanja vya michezo kwa sababu viwanja hivyo vimejengwa kwa ajili ya kuwaburudisha wananchi.
“Asubuhi baada ya kuona maandishi haya sisi tulishtuka kwa sababu kama siasa sasa inahamia kwenye kuta za viwanja vya michezo haipendezi kwa sababu huu ni uwanja wa michezo,” alisema.
Alisema waliamua kufuta maandishi hayo kwa sababu uwanja huo umepakana na shule mbili za sekondari na msingi kwa hiyo si vizuri wanafunzi wa shule hizo kuyaona maandishi hayo.
Meneja wa uwanja huo, Anthony Nyembela, alisema baada ya kuona maandishi hayo aliwasiliana na Kaimu Katibu wa CCM Mkoa wa Dodoma, Omary na kukubaliana wayafute.
“Kwa kweli sikupendezewa na hali hii ambayo nimeikuta hapa kwani asubuhi nilipokuja nilikuta wameandika, ikiwa ni pamoja na kutupa vipeperushi ndipo nilipoamua kumpigia simu bosi wangu ambaye ni Katibu wa CCM mkoa ambaye aliniagiza nimtafute fundi wa kuyafuta,” alisema
.
Alisema kuwa baada ya makubaliano hayo walianza kazi ya kuyafuta na kurejesha rangi ya ukuta huo wa uwanja kama ilivyokuwa awali.

KAULI YA POLISI
Kamanda wa Polisi Mkoa wa Dodoma, David Misime, alithibitisha kutokea kwa tukio hilo jana alfajiri la kuokotwa vipeperushi hivyo.
Kamanda Misime alisema baada ya kupokea vipeperushi hivyo, Polisi imeendelea kupata taarifa mbalimbali za watu walioshiriki kuandaa na kusambaza vipeperushi hivyo ili waweze kukamatwa na kufikishwa Mahakamani kujibu tuhuma za kuhamasisha uvunjivu wa amani na kutoa vitisho.
Alitoa wito kwa wananchi na wageni wote wanaofika Dodoma kuzingatia utii wa sheria bila shuruti na kila mmoja kujiepusha kujiingiza kwenye uvunjifu wa amani, kujiingiza kwenye mikusanyiko isiyo halali na maandamano ambayo yamepigwa marufuku na Jeshi la Polisi.
Alionya kuwa atakayekiuka na kujiingiza katika vitendo hivyo vya kiuharifu  atachukuliwa hatua kali kwa mujibu wa sheria za nchi na mamlaka iliyopewa Jeshi la Polisi.
“Nawahakikishia wananchi na wageni wapenda amani waliopo Dodoma kuendelea na shughuli zenu kama kawaida kwani Jeshi la Polisi limejiimarisha ipasavyo kukabiliana na yeyote yule atakayekiuka sheria na maelekezo yaliyotolewa,” alisema.
Jana wajumbe wa BMK walikuwa kwenye vikao vya kamati za bunge hilo kwa ajili ya kuhakiki maandishi na maudhui ya rasimu iliyowasilishwa jana bungeni na Mwenyekiti wa Kamati ya Uandishi na leo Bunge linakutana kwa ajili ya kufanya uhakiki wa pamoja kabla ya zoezi la kupiga kura kuanza Jumatatu ijayo.
 

CHANZO: NIPASHE