MNYIKA AMBANA MAKINDA KUHUSU BARAZA LA VIJANA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Mbunge wa Ubungo,John Mnyika.

Mbunge wa Ubungo, John Mnyika, amemtaka Spika wa Bunge, Anna Makinda, kuuelezea umma sababu za kutokuwapo kwa muswada wa sheria ya Baraza la Vijana la Taifa kwenye tovuti ya Bunge  kama alivyoahidi Desemba 21, mwaka jana katika mkutano  wa 14 kikao cha 15 cha Bunge.
Kadhalika, Mnyika amemtaka Spika Makinda kutoa maelezo ni lini muswada huo utapangiwa tarehe ya kujadiliwa pamoja na siku utakaopelekwa katika kamati za bunge zinazohusika.
“Ninamtaka Spika wa Bunge kutoa kauli ya kuueleza umma sababu ya maelekezo yake ya muswada huo kuwapo kwenye tovuti ya Bunge kutokutekelezwa na ni lini muswada huo utapangiwa tarehe ya kujadiliwa, na ni kwanini mpaka sasa muswada huo haujapelekwa kwenye kamati zinazohusika,” alisema Mnyika.
Mnyika alisema sera ya zamani ya maendeleo ya vijana ya mwaka 1996 ilitamka kwamba kutaanzishwa  Baraza la Vijana na suala hilo kurudiwa katika Sera mpya ya mwaka 2007.
Aliongeza kuwa hata hivyo Serikali imekuwa ikikwepa kuhakikisha kwamba matakwa hayo ya sera tajwa yanatekelezwa pamoja na kuwa suala hilo linahusu mustakabali wa maendeleo ya vijana nchini.
Aidha Mnyika alitoa wito kwa vijana na wadau wa maendeleo ya vijana kuingilia kati suala hili na kuisimamia Serikali kuwasilisha muswada huo bungeni.
Alisema katika majumuisho ya Bajeti ya Wizara yenye dhamana ya vijana kwa mwaka jana katika mkutano wa 11 kikao cha 30, Serikali ilitumia kisingizio cha kuwapo kwa Bunge la Bajeti na kukwepa kuwasilishwa kwa muswada huo bungeni.
Aliongeza kuwa hata hivyo, ahadi ya Serikali ya kuwasilisha muswada haikutekelezwa kwenye mikutano mitatu uliyofuatia ya 12, 13, 14 na 15, na kueleza kuwa mkutano  wa 16 ni mwafaka kuwezesha maamuzi kufanyika kwa ajili ya maendeleo ya vijana nchini.
Mnyika aliwataka vijana nchini na wadau pasipo kuangalia itikadi kuwasilisha maoni katika ofisi yake juu ya kuboreshwa kwa  muswada wa Baraza la Vijana la Taifa, pia kuchukua nakala ya muswada binafsi ili waweze kuijadili na kutoa maoni pindi utakaposomwa kwa mara ya pili bungeni .

CHANZO: NIPASHE