Na Jacquiline Mrisho – MAELEZO.
Mkutano
wa Tano wa Bunge la 11 la Bunge la Jamhuri ya Muungano wa Tanzania
ambao ulikaa kwa muda wa siku 11 tangu Novemba 01 na kuhitimishwa
Novemba 11 mwaka huu umewapa fursa wabunge kujadili na kutoa maamuzi
katika mambo muhimu kwa Taifa.
Awali
kabla ya kuanza kwa mkutano huo, Spika wa Bunge Mhe. Job Ndugai alisema
kuanza kwa mkutano huo kunafuatia kukamilika kwa vikao vya Kamati za
Kudumu za Bunge vilivyofanyika kwa muda wa wiki mbili mjini Dodoma
ambapo kamati hizo zilikutana na kujadili na kuishauri Serikali katika mambo mbalimbali ya kuwaletea wananchi maendeleo.
“Hali
ya Bunge ni shwari na salama, nawasihi wabunge ambao bado hawajawasili
Dodoma waje ili tuweze kuifanya kazi ya kuishauri Serikali”, alisema
Mhe. Ndugai.
Hakika ukitaka kujenga nyumba imara ni vema ukaanza na kujenga msingi imara wenye kukidhi mahitaji ya nyumba inayojengwa.
Ili
taifa liendelee kuimarika kiuchumi, kijamii na kisiasa, Bunge likiwa
muhimili muhimu wa kuishauri na kuisimamia Serikali limetekeleza wajibu
wake wa Kikatiba ipasavyo. Mambo 10 yaliyotekelezwa kwa manufaa ya
taifa:
Bunge
lilijadili, kupokea na kutoa maoni ambayo ndio dira na muongozo wa
kuandaa Bajeti ya mwaka 2016/2017 ambapo Serikali imeanza kuandaa bajeti
hiyo kwa kufuata mwongozo uliojadiliwa kwa manufaa ya maendeleo ya nchi
kwa mwaka ujao wa fedha.
Waziri
wa Fedha na Mipango, Dkt. Philip Mpango aliwasilisha Mapendekezo ya
Mpango wa Maendeleo wa Taifa wa mwaka 2016/17 ambapo sekta ya viwanda
ndio kipaumbele cha kwanza ambacho malighafi yake nyingi inapatikana
nchini hususani kwenye sekta za kilimo, mifugo, uvuvi, madini na
maliasili nyingine.
Waziri
Mpango amesema maeneo yanayosaidia katika ukuaji wa uchumi na ustawi wa
Taifa ni pamoja na utalii, misitu na wanyamapori, madini, hali ya hewa,
ushirikiano wa kikanda na kimataifa na utawala bora.
Vipaumbele
vingine vinavyopendekezwa katika mpango huo ni kuweka msisitizo mkubwa
katika kufungamanisha maendeleo ya viwanda na maendeleo ya watu kwa
kuhakikisha usalama wa chakula, afya, kuimarisha elimu, usimamizi wa
maji safi na majitaka, nishati ya uhakika, upatikanaji wa ajira, hifadhi
ya jamii, usawa wa jinsia na watu wenye ulemavu.
Bunge
limejadili na kupitisha Miswada miwili ukiwemo Muswada wa Sheria ya
Huduma za Habari wa mwaka 2016. Akiongea na waandishi wa habari mara
baada ya kupitishwa kwa Muswada huo, Waziri wa Habari, Utamaduni, Sanaa
na Michezo, Nape Nnauye amewashukuru wadau wote walioshiriki katika
kutoa maoni ambayo yamepelekea kuhitimisha kwa kuupitisha Muswada huo.
“Kwa
niaba ya Serikali napenda kuwashukuru wadau wote walioshiriki kwa namna
moja au nyingine katika kuhakikisha tunatimiza malengo ya takribani
miaka 20 iliyopita ya kuifanya taaluma hii ya habari kuheshimika kama
zilivyo taaluma nyingine,” alisema Waziri Nape.
Waziri
Nape ameongeza kuwa kwa sasa Muswada huo umeshapitishwa na kukiri kazi
iliyobaki ni kutunga Kanuni ambapo amewaomba wadau wa tasnia ya habari
kujitokeza kwa wingi kwa ajili ya kutoa maoni yatakayopelekea kuwa na
kanuni zenye tija kwa wanahabari na taifa kwa ujumla.
Kwa
upande wake Mwanasheria Mkuu wa Serikali, George Masaju amesema kuwa
Muswada wa Sheria ya Huduma za Habari wa mwaka 2016 ni mwanzo mpya wa
tasnia ya habari nchini ambapo amewaasa wadau wa habari wakiwemo
waandishi wa habari kutambua kuwa haki mara zote huendana na wajibu,
hivyo hakuna haki isiyo na wajibu.
Bunge
lilitimiza wajibu wake wa kutunga Sheria kwa kupitisha Muswada wa
Sheria ya Huduma za Habari wa mwaka 2016 ambao tayari Rais Dkt. John
Pombe Magufuli ameuridhia na amesaini Novemba16 mwaka huu ambapo sasa ni
miongoni mwa Sheria kamili ya nchi.
Muswada
mwingine uliojadiliwa wa Sheria ya Marekebisho ya Sheria mbalimbali
Namba 3 wa mwaka 2016 uliowasilishwa Bungeni na Mwanasheria Mkuu wa
Serikali, George Masaju ukipendekeza kufanya marekebisho katika Sheria 9
tofauti kwa lengo la kurahisisha utekelezaji madhubuti wa Sheria hizo
hivyo, kuondoa upungufu unaojitokeza wakati wa kutumia Sheria hizo na
pia kuoanisha masharti ya Sheria zinazorekebishwa na masharti yaliyopo
katika Sheria nyingine zilizopo.
“Baadhi
ya masuala yaliyozingatiwa katika Muswada huu ni kubadilisha vifungu
vya Sheria kwa kufuta baadhi ya vifungu vya Sheria hizo na kuviandika
upya, kufuta baadhi ya maneno kwenye vifungu vya Sheria, kuingiza maneno
mapya na kuongeza vifungu vipya,”alisema Masaju.
Wabunge
walipewa semina kabla ya kujadili Mkataba wa Makubaliano ya Ushirikiano
wa Kiuchumi kati ya Jumuiya ya Afrika Mashariki (EAC) na Jumuiya ya
Ulaya (EU) (EPA) ili wapate uelewa na hatimaye kuishauri Serikali juu ya
suala hilo.
Watoa
semina hiyo walikuwa ni wataalamu kutoka Chuo Kikuu cha Dar es Saalam
wakiongozwa na Prof. Palamagamba Kabudi, Dkt. Ng’waza Kamata na Dkt.
John Jingu pamoja na Katibu Mkuu Wizara ya Viwanda, Biashara na
Uwekezaji, Prof. Adolf Mkenda.
Baada
ya Semina hiyo, Bunge lilichukua jukumu lake la kuchambua na kujadili
kwa kina Mkataba huo ambapo hatimaye Bunge limeafiki kuishauri Serikali
kutosaini mkataba huo kwa kuwa umeonekana utazorotesha ukuaji wa uchumi
wa nchi hasa kipindi hiki ambacho Tanzania imedhamiria kujenga uchumi wa
viwanda.
Akitoa
maoni yake wakati wa mjadala Mbunge wa Nzega Mjini, Hussein Bashe
alisema kuwa tatizo lililopo katika mkataba huo ni kutoitambua nchi kama
nchi na badala yake kuangalia nchi zote kwa pamoja hivyo amewashauri
wabunge kujadili kwa makini bila kuingiza itikadi za kichama.
“Kwa
kuwa kifungu cha 143 cha mkataba huo kinaruhusu kupeleka marekebisho,
naishauri Serikali yetu ipeleke marekebisho ya kupendekeza kila nchi
iingie mkataba kivyake kulingana na maslahi ya nchi yake”, alisema
Bashe.
Naye,
Mbunge wa Mchinga, Hamidu Bobali amesema kuwa mkataba huo haufai kwa
maslahi mapana ya Taifa kwani unataka kuondoa ushuru kwa bidhaa
zinazoingia nchini wakati nchi ya Tanzania inaingiza bidhaa nyingi
kutoka nje kuliko kutoa bidhaa za ndani.
“Kama
tukikubali tukaondoa ushuru wa kuingiza bidhaa kutoka nje basi
tutapoteza mapato mengi yanayotokana na kuwepo kwa bandari pia
tunatakiwa tujiulize kama mkataba umeruhusu uingizaji na utoaji wa
bidhaa huru je nchi yetu ina bidhaa zinazokidhi vigezo vya kuingia
katika nchi za Ulaya?” , alihoji Bobali.
Bunge
limepokea Ripoti ya Mkaguzi Mkuu wa Serikali, taarifa ya Mdhibiti na
Mkaguzi Mkuu wa Hesabu za Serikali (CAG) pamoja na Mapendekezo ya Kamati
ya Kudumu ya Bunge ya Hesabu za Serikali na za Mitaa.
Aidha,
kupitia Kamati ya Kudumu ya Bunge ya Hesabu za Serikali (PAC), Bunge
limepata fursa ya kujadili taarifa ya Hesabu za Serikali ambayo
iliyowasilishwa na Mwenyekiti wa Kamati hiyo, Mhe. Naghenjwa Kaboyoka
ambapo Kamati iliishauri Serikali kuanzisha mfumo maalum wa uwekezaji
ambao utatunza fedha zitakazowekwa katika mfuko huo na baadae kutumika
kama mitaji katika maeneo ambayo nchi inataka kuwekeza.
“Sisi
kama kamati tunaishauri Serikali kuanzisha mfuko maalum wa uwekezaji
kwani utaisaidia Serikali kupata fedha za kufanyia maendeleo na kupata
mitaji ya kuwekeza sehemu mbalimbali ili kuhakikisha maslahi ya nchi
yanalindwa na watanzania wanaiona faida ya uwekezaji,” alisema
Kaboyoka.
Mhe.
Kaboyoka amefafanua kuwa Kamati imetoa ushauri huo baada ya kukwama kwa
baadhi ya miradi pamoja na shughuli nyingine za Serikali zinazofanywa
ili kuwasaidia wananchi kutokana na ukosefu wa fedha za kufanyia
shughuli hizo hivyo kuanzishwa kwa mfuko huo kutahakikisha faida ya
uwekezaji inaonekana.
Kwa
upande wa Kamati ya Kudumu ya Bunge ya Hesabu za Serikali za Mitaa
(LAAC) iliyowasilishwa Bungeni hapo na Mwenyekiti wa Kamati hiyo Mhe.
Vedasto Ngombale Mwiru amezikumbusha Halmashauri hizo kutenga asilimia
10 ya fedha za mapato kutoka katika vyanzo vya ndani kwa ajili ya mfuko
wa wanawake na vijana.
“Sisi
kama Kamati tunaishauri Serikali kuleta Bungeni Muswada wa Sheria ya
Mfuko wa Maendeleo ya wanawake na vijana ili iwe sheria ambayo
itatekelezwa kwa lazima hivyo kuendelea kuinua maisha ya wanawake na
vijana kama ilivyokusudiwa,” alisema Ngombale Mwiru.
Pia
kamati hiyo imetoa rai kwa Halmashauri zote nchini kutofanya kazi kwa
mazoea na badala yake kusimamia miradi mbalimbali kwa ukaribu ili iweze
kukamilika kwa wakati na kutumika kama ilivyo kusudiwa.
Waziri
wa Elimu, Sayansi na Teknolojia, Prof. Joyce Ndalichako alitoa kauli ya
Serikali kuhusu utoaji wa mikopo ya wanafunzi wa Elimu ya Juu kwa mwaka
wa masomo 2016/2017.
Prof.
Ndalichako amesema kuwa jumla ya wanafunzi 119,012 wa Elimu ya Juu
nchini wametengewa kiasi cha shilingi bilioni 483 katika mwaka wa fedha
2016/2017 kwa ajili ya kupewa mikopo itakayowasaidia kujikimu wakati
wakiwa vyuoni.
Ameongeza
kuwa mikopo hiyo imetolewa kwa kuzingatia malengo ya Mfuko wa Mikopo
kwa Wanafunzi wa Elimu ya Juu ambapo kigezo kikuu kimekuwa ni uhitaji wa
mwanafunzi pamoja na fani za kipaumbele anayosoma mwanafunzi.
“Kwa
mujibu wa Wizara yetu, fani za kipaumbele ni pamoja na Sayansi za Tiba
na Afya, Ualimu wa Sayansi na Hisabati, Mafuta na Gesi Asilia, Sayansi
Asilia na Mifugo, Uhandisi wa Viwanda pamoja na Kilimo na Umwagiliaji
lakini kuna baadhi ya wanafunzi ambao wamedahiliwa kwenye fani za
kipaumbele lakini hawana vigezo vya kupewa mikopo kutokana na tathmini
ya uhitaji kuonesha kuwa wanaweza kusomeshwa na wazazi au walezi
wao,”alisema Prof. Ndalichako.
Aidha,
Prof. Ndalichako amesisitiza kuwa jumla ya wanafunzi 25,717
wanaoendelea na masomo waliokuwa na mikopo wataendelea kupatiwa mikopo
hiyo kama ilivyokuwa katika mwaka wa masomo uliopita ambapo hadi sasa,
wanafunzi ambao vyuo vyao tayari vimewasilisha taarifa za matokeo ya
wanafunzi wao Bodi imekwishawatumia fedha zao za mkopo.
Katika
taarifa hiyo, Prof, Ndalichako ameelezea kuwa taratibu za kuwabaini
wanafunzi wasio na sifa stahiki zinaendelea na zitakapokamilika
wanafunzi hao hawatopewa mkopo, ameahidi kufanya mapitio ya udahili wa
wanafunzi vyuoni pamoja na utaratibu mzima wa utoaji na urejeshwaji wa
mikopo kwa lengo la kuwa na mfumo bora zaidi.
Kulingana
na ratiba ya shughuli za Bunge, upo muda wa maswali ya Wabunge kwa
Serikali ambayo hupatiwa majibu kutoka Wizara mbalimbali na taasisi
zake. Pia kila siku ya Alhamisi wakati wa mikutano ya Bunge utaratibu wa
wabunge kumuuliza Waziri Mkuu maswali ya papo kwa papo yasiyozidi 10
ambayo hujatolea majibu ya Serikali.
Aidha,
wakati shughuli za Bunge zikiendelea, kumetokea misiba mitatu
iliyohusisha Bunge ya kifo cha ghafla cha Mbunge mmoja aliyekuwa
madarakani Hafidh Tahir Ali, Spika Mstaafu Samuel Sitta na Joseph
Mungai. Vifo hivyo vimekuwa pigo kwa familia, Bunge na taifa kwa ujumla
ambapo Wabunge walipata fursa ya kuwaaga waliotangulia mbele ya haki.
Waziri
Mkuu wa Jamhuri ya Muungano wa Tanzania Kassim Majaliwa aliahirisha
Bunge hadi Januari 31 mwaka 2017 bila kusoma hotuba aliyoiandaa kutokana
na misiba ya viongozi hao hatua iliyotoa fursa kwa Wabunge kushiriki
mazishi kwenye maeneo husika walipozikwa viongozi hao.
Mwisho
0 comments:
Post a Comment