MCHAKATO KATIBA MPYA SI KIPAUMBELE -MAJALIWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Imeandikwa na Magnus Mahenge, Dodoma.

Waziri Mkuu, Kasim Majaliwa.

UKAMILISHAJI wa Mchakato wa Katiba Mpya si kipaumbele cha serikali bali inataka kwanza kuhakikisha Watanzania wanapata huduma za jamii kama elimu, afya, maji na miundombinu.

Waziri Mkuu, Kassim Majaliwa alitoa tamko hilo jana wakati akijibu swali la Mbunge wa Temeke, Abdallah Ali Mtolea (CUF) aliyetaka kujua lini serikali itakamilisha mchakato wa katiba ulioanzishwa na ile ya awamu ya nne.

Waziri Mkuu alisema, suala la Katiba si miongoni mwa vipaumbele vya Serikali ya Awamu ya Tano, kwani kukamilisha kunahitaji fedha nyingi na ni gharama kubwa na kwa sasa fedha zinazokusanywa zinaekelezwa katika kuboresha huduma za afya, elimu na maji.

Majaliwa alisema kila mwaka serikali inaweka vipaumbele vyake, kwa sasa vipaumbele vya serikali ni kuwapa wananchi huduma za jamii. Alisema mchakato wa Katiba unalenga kufanya marekebisho ya mambo mbalimbali ambayo yamo katika katiba ya sasa, hivyo hiyo iliyopo inaweza kuendelea kutumika hadi hapo fedha zitakapopatikana kwa ajili ya mchakato huo na pale itakapokuwa kipaumbele cha serikali.

“Mchakato wa Katiba ni gharama na serikali inatambua umuhimu wake, hivyo kwa sasa inalenga kuboresha huduma za wananchi kwa kutumia katiba iliyopo,” alisema Majaliwa.

CHANZO HABARI LEO