WATOTO WALEMAVU KUSAKWA MAJUMBANI KUPELEKWA SHULE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Imeandikwa na Sifa Lubasi, Kongwa

HALMASHAURI ya wilaya ya Kongwa imesema kwa kushirikiana na jamii itahakikisha inatumia vyombo vya dola kuwasaka watoto watakaobainika kufichwa majumbani ili waweze kupelekwa shule.

Kauli hiyo imetolewa na Mwenyekiti wa Halmashauri ya Wilaya ya Kongwa, White Zuberi kwenye semina iliyoandaliwa na mradi wa The Foundation for Civil Society wilayani hapa.

Alisema katika msako huo, wazazi na walezi wenye watoto ambao ni walemavu watakaobainika kuwaficha watoto wao majumbani katika kipindi cha uandikishaji wa shule watachukuliwa hatua kali pamoja na kufikishwa mahakamani.

Akifungua semina ya ufuatiliaji wa mapato na matumizi ya rasilimali za umma kwa wanafunzi wenye mahitaji maalum iliyofanyika wilayani Kongwa, alisema wilaya hiyo imekuwa na changamoto kwa upande wa wazazi na walezi wenye watoto ambao ni walemavu.

Alisema bado kuna kundi kubwa la watoto wenye ulemavu ambao wananyimwa fursa ya kupata elimu, hivyo kwa kushirikiana na jamii watafuatilia majumbani watoto hao ili waweze kupelekwa shule na kuandikishwa. Mwenyekiti wa Chama cha Wasioona Mkoa wa Dodoma (TKB), Omary Lubuva alisema, ipo haja ya wazazi kuona umuhimu wa kuwapeleka watoto wenye ulemavu shule ili waweze kuja kuwa msaada mkubwa wa kupiga vita umaskini katika kaya.

CHANZO HABARI LEO