Gesi asilia yagundulika katika bahari ya hindi-waziri wa nishati na madini‏

Masoud Masasi,Dodoma

WIZARA ya Nishati na Madini imesema iko katika hatua za mwisho

kukamilisha maandalizi ya sera,sheria na mpango kabambe wa matumizi ya

gesi asili hapa nchini ambapo itaweza kusaidia kuondokana na matumizi

ya nishati ya mkaa pamoja na tatizo la umeme.

Hayo yalibainishwa jana mjini Dodoma na Waziri wa Nishati na Madini

Profesa Sospeter Muhongo wakati alipokuwa akizungumza na waandishi wa

habari juu ya ugunduzi wa gesi na mafuta asili hapa nchini.

Muhongo alisema mchakato huo unatarajiwa kukamilika mwanzoni mwa mwezi

Septemba mwaka huu kabla ya kuwasilishwa rasmi serikalini kwa ajili

ya kupitishwa ambapo amesema marekebisho madogo kwenye sheria ya gesi

na mpango wa matumizi ya gesi yanaendelea kufanyika sambamba na sera

ya gesi.

“Tuko katika hatua za mwisho kukamilisha maandalizi ya sera,sheria na

mpango kabambe wa matumizi ya gesi asili nchini na baada ya miaka

kadhaa tutaondokana na matumizi ya nishati ya mkaa na kuni majumbani

na kuanza kutumia gesi ambapo ifikapo mwezi julai mwaka huu rasimu ya

kwanza itakuwa tayari”alisema Muhongo.

Akizungumzia mchakato wa ugunduzi wa gesi asili nchini,Waziri Muhongo

alisema kumekuwa na kasi kubwa ya utafutaji wa mafuta na gesi ambapo

amesema kiasi cha gesi asili kilichogundulika katika kina cha maji

marefu kinafikia futi za ujazo 20.97 trilioni katika bahari ya Hindi.

Alisema gesi hiyo inajumuisha kisima Lavan kilichogunduliwa mapema

wiki hii na kampuni ya Statoil kwa kushirikiana kampuni ya Exxon Mobil

ambapo amesema kisima hicho kipo katika kitalu namba mbili Mashariki

mwa Mkoa wa lindi kilometa 80 kutoka nchi kavu.

“Katika kipindi hiki cha miaka mitatu tumekuwa na kasi kubwa ya

utafutaji wa mafuta na gesi asili hapa nchini na tumeweza kugundua

kiasi cha gesi asili katika kina cha maji marefu takribani futi zenye

ujazo wa 20.97 trilioni ikijumuishwa kisima kilichogunduliwa wiki hii

cha lavani mashariki mwa mkoa wa Lindi”alisema.

Alibainisha kuwa makampuni 19 makubwa duniani ya utafutaji wa mafuta

na gesi yapo hapa nchini yapo kwa ajili ya kufanya utafiti ambapo

wameweza kutoa leseni 28 kwa ajili ya kufanya shughuli hiyo.

Waziri huyo alisema serikali itaendelea kutoa msukumo zaidi kwa

makampuni ya utafutaji mafuta na gesi asili ili yaendelee kufanya

utafiti pamoja na ugunduzi zaidi ambapo amesema itasaidia kuleta

maendeleo ya nchi.