TANZANIA INA UPUNGUFU WA DAMU CHUPA 350,000 HATUA INAYOTOKANA NA KUTOKUWEPO KWA MBADALA YA KUPATA DAMU‏

Masoud Masasi,Kondoa  -Dodoma Yetu

MPANGO wa Taifa wa Damu Salama umesema unaupungufu wa damu wa chupa

350,000  katika benki zake zilizopo hapa nchini jambo ambalo wamesema

likifanya kushindwa kusambaza damu ya kutosha katika hospitali

mbalimbali.

Hali hiyo  imeelezwa inatokana na wananchi kutokuwa na mwamko wa

uchangiaji wa damu pindi wanapotakiwa kuchangia badala yake wanafunzi

ndio wamekuwa wakijitolea  kutoa damu.

Hayo yalibainishwa juzi wilayani hapa na Meneja wa Mpango wa Damu

Salama kanda ya Mashariki Grace Mlingi wakati wa maadhimisho ya siku

ya wachangiaji damu duniani.

Mlingi alisema hatua hiyo ya kutokuwa na damu ya kutosha hapa nchini

inatokana na kutokuwa na mbadala wa upatikaji wa damu salamuisipokuwa

kutoka kwa binadamu.

Alisema wananchi wengi wamekuwa wakishindwa kujitokeza kwenye sehemu

ya utoleaji damu zaidi ya kuwapata wanafunzi peke yake jambo alilosema

halipendezi kwa kuwa damu hiyo ni kwa ajili ya matumizi ya watu wote.

‘’Tunaupungufu mkubwa wa chupa za damu kwenye benki zetu hapa nchini

nah ii inatokana na kutokuwa na mwamko kwa wananchi licha ya jitihada

mbalimbali za kutoa elimu lakini bado mkitangaza wanakuja wanafunzi

pekee”alisema Mlingi.

Meneja huyo alibainisha kuwa kuchangia damu kunasaidia kuepusha vifo

kwa watoto wadogo,wajawazito pamoja na majeruhi ambao wamekuwa

wakihitaji damu kutokana na kuishiwa hivyo kuwepo kwa damu za kutosha

kutachangia kuepukana na tatizo hilo.

Akizungumzia mahitaji ya damu katika kanda ya Mashariki,Mlingi alisema

wanahitaji chupa za damu 80,000  sawa na asilimia 67 ili ziweze

kukidhi mahitaji ya kanda hiyo.

“Mahitaji haya tunaweza kufanikiwa ikiwa wananchi watajitokeza

kuchangia damu  katika kanda yetu ili tuweze kukabiliana na upungufu

huo inabidi tujitokeze kutoa damu tusiogope”alisema meneja huyo.

Kwa upande wake Mkuu wa Idara ya Umma na Uhamasishaji wa mpango huo

katika kanda hiyo  Lucas Michael alisema bado elimu kubwa inahitaji

kwa wananchi juu ya suala nzima la uchangiaji wa damu salama.

Alisema wananchi wamekuwa na imani potofu kuwa ukitoa damu unaweza

kupoteza maisha huku wengine wakiohofu kuwa watapimwa ukimwi kabla ya

kutoa damu.

“Kabla ya kuanza kutoa damu vitu ambavyo anapimwa mtoaji damu ni

uzito,kiwango cha damu na msukumo wa damu pekee ambapo baadaye baada

ya kukusanywa ndipo  zinapimwa virusi vya ukimwi,homa ya ini na

kaswende ”alisema Michael.

Hata hivyo katika maadhimisho hayo  yaliyofanyika kikanda wanafunzi wa

shule ya sekondari ya wasichana ya Kondoa ndio pekee walioweza

kujitolea kuchangia damu.