Mgomo baridi SHIMIWI

MASHINDANO ya Wizara na Idara za Serikali (SHIMIWI), yameanza mjini hapa huku baadhi ya timu zikilalamika kutolipwa fedha zao na kununuliwa vifaa vya michezo hivyo kukosa ari ya kushiriki michezo hiyo kikamilifu.

Wakizungumza na Tanzania daima, baadhi ya wachezaji wa timu shiriki, wameeleza kushiriki michuano hiyo bila ya kuwa na amani na kusababisha wengine kuwa na tamaa ya kujiunga na timu nyingine na hata kucheza kwa mgomo wa chini chini.

Wakizungumza kwa kuomba kutotajwa majina yao, wafanyakazi hao ambao wengine wanatoka timu zenye majina, walibaniasha kuwa, hawajalipwa zao hadi sasa na wakikosa vifaa kama suti za michezo na vinginevyo.

Akifungua mashindano hayo juzi, Naibu Waziri wa Habari, Vijana, Utamaduni na Michezo, Amos Makala, amezitaka Wizara, Idara na Taasisi za Serikali, kuacha tabia ya kushindwa kuleta timu kushiriki kwa kisingizio cha ukosefu wa bajeti, kwani Bunge limekuwa likipitisha bajeti hizo bila vipingamizi.

“Kumekuwepo na visingizo vingi vya kushindwa kuleta timu kushiriki katika michezo hii ambayo ni muhimu, kwa kudai kuwa hakuna bajeti, wakati bunge limekuwa likipitisha bajeti kwa ajili ya michezo hiyo kila wakati,” alisema na kuongeza;

Sasa natumia mamlaka yangu kuwaagiza, mhakikishe mnatenga bajeti ya kutosha ya michezo ili timu zenu ziweze kushiriki katika mashindano mbalimbali hapa nchini.

Naibu Waziri huyo, alifafanua kuwa, Wizara, Idara na Taasisi za Serikali zina uwezo wa kuweka bajeti ya kutosha na kuwawezesha watumishi wake kushiriki michezo, hivyo ni wajibu wao kutekeleza.

Pia, aliwataka washiriki kuonyesha nidhamu pamoja na kuzingatia ratiba na sheria kwa kuwa wote ni watumishi wa serikali na pia ni kioo cha jamii.

Awali, akisoma taarifa fupi kwenye ufunguzi huo, Mwenyekiti wa Shimiwi, Daniel Mwalusamba, aliwataka waajiri kutenga bajeti ya fedha za kutosha kwa ajili ya kuwawezesha watumishi wao kushiriki kikamilifu katika michezo na mazoezi, kwani ni sehemu zao za kazi.

Mashindano hayo yanashirikisha timu 43 katika michezo ya soka, netiboli, kuvuta kamba, baiskeli, drafti, bao na vishale.

Chanzo: Tanzania Daima