Mpwapwa hatarini kuwa jangwa

HALMASHAURI ya Wilaya ya Mpwapwa, mkoani hapa ipo hatarini kukumbwa na ukame na kuwa jangwa kutokana na kukithiri kwa vitendo vya uharibifu wa mazingira.

Hali hiyo imedhihirishwa juzi na wataalamu mbalimbali akiwemo Mkuu wa Wilaya ya Mpwapwa, Christopher Kangoye aliyeeleza namna ambavyo wakazi wa wilaya hiyo wamekuwa wakifanya uharibifu wa mazingira ikiwamo kuchoma miti, kufyeka misitu pamoja na kuharibu vyanzo vya maji.

Akifungua mdahalo kuhusu mabadiliko ya tabia nchi na athari zake ulioandaliwa na mtandao wa mashirika ya asasi za kiraia wilayani hapa (Nngomnet), Kangoye alisema hivi sasa suala la uharibifu wa mazingira limekuwa ni tatizo kubwa na linamuumiza kichwa  kutokana na kuwepo kwa watu wachache wenye ubinafsi.

Alibainisha mazingira ya Mpwapwa hivi  sasa yamekuwa tofauti na awali kutokana na kupoteza asili yake, hasa ukiilinganisha na enzi za Shaaban Robert (marehemu) ambaye alikuwa akiishi wilayani hapa kwani mazingira yalikuwa ya kijani na ya kuvutia.

Mkuu huyo wa wilaya alisema kukithiri kwa vitendo vya uharibifu wa mazingira, hasa katika maeneo ya milimani kunaweza kusababisha wilaya hiyo kuwa jangwa.

Ofisa ardhi wa wilaya, Devis Mlowe, alisema shughuli za kibinadamu hasa kilimo cha kuhamahama, ufugaji holela na uharibifu wa misitu zimekuwa zikichangia mabadiliko ya tabia nchi ikiwemo kubadilika kwa misimu ya mvua hali ambayo ni hatari.

Chanzo: Tanzania Daima