Chigonela: Kituo mfano wa jehanamu kwa wajawazito mjini Dodoma

 

Wajawazito wakiwa nje ya jengo la Chigonela  mjini Dodoma baada ya kutoka ndani ili kupisha shughuli za kupuliza dawa za kuua kunguni ndani ya jengo hilo. 

Kinamama hawa wanasubiri muda wao wa kujifungua, lakini wanaongezewa uchungu kwa kuishi na wadudu wasumbufu, wanaonyonya damu zao.

Kama ilivyo kwa kiwanda au mashine inavyotumika kutengeneza bidhaa za aina mbalimbali, ndivyo ilivyo kwa mwanamke, kiwanda mahsusi cha kutengeneza binadamu mpya, yaani mtoto.

Ni ukweli usiopingika kuwa licha ya mchango mkubwa ambao hupatikana pia kwa mwanamume katika uumbaji wa mwanadamu, lakini bado mchango wa mwanamke ni mkubwa zaidi ya ule wa mwanamume.

Maumbile asili ya mwanamke ndiyo humfanya aendelee kuwa kiwanda cha kumfinyanga mwanadamu mpya na kumleta duniani kwa uwezo wa Mungu na utaratibu wake.

Ili yote yafanyike kwa umakini na umaridadi, mwanamke mjamzito anahitaji mazingira mazuri yenye kumpa faraja na matumaini na  hata kumwondolea mawazo ya jinsi gani itakavyokuwa siku ya mwisho ya siku zake 270  au miezi tisa kama ilivyozoeleka za kubeba mimba.

Maandalizi hayo kwa mjamzito yanakwenda sambamba na tumaini la furaha yake pamoja na nderemo kwa jamii inayomzunguka ambayo kila mmoja wake wakati wote  huwa na mategemeo ya kupata kiumbe kipya.

Ni kutokana  na hilo, bado kuna msisitizo kuhusu maandalizi ya kina kutoka kwa familia au jamii anayotoka mwanamama huyo.

Serikali kwa  upande wake pia inalo jukumu la msingi la kujiandaa na kumsaidia mama huyo katika kumwekea mazingira mazuri na salama wakati wa kujifungua.

Mjini Dodoma, kipo kituo maalumu kilichojengwa kwa ajili ya kuwapa afueni wanawake wajawazito hasa wale ambao muda wao wa kujifungua umekaribia ili wawe karibu na huduma zote muhimu ikiwamo hospitali.

Kituo hicho ambacho kipo Kata ya Majengo katikati ya mji, kimepewa jina maalumu, Chigolela,  jina ambalo kwa Kigogo, watu asili wa mji na mkoa huo, lina maana ya mimba iliyopitiliza muda wake wa kujifungua.

Chigolela ya Dodoma  ambayo ilijengwa kwa ajili ya kutoa huduma kama nilivyoeleza hapo juu, imegeuka na kuwa sehemu ya gereza la tabu na mateso  kwa wanawake,  kiasi cha kukimbiwa na wanawake wengi ambao huamua kukaa majumbani au kupanga katika nyumba kwa ndugu zao wengine.

Majira ya asubuhi naingia katika kituo hicho kwa ajili ya kushuhudia kile nilichokuwa nikiambiwa kama kina ukweli kiasi gani ndipo ninakutana na hali ambayo kimsingi haielezeki.

Chanzo;Mwananchi.