Kanuni usalama wa mimea yawabana wanasayansi

WANASAYANSI nchini wamemtaka Waziri wa Nchi Ofisi ya Rais (Mazingira), Theresia Huvinza, kupunguza masharti ya kanuni ya usalama wa mimea ya mwaka 2009 ambayo imekuwa ikiwabana watafiti na washiriki kutumia Jene kuweza kuifanya mbegu kustahimili ukame. Kauli hiyo ilitolewa mjini hapa mwishoni mwa wiki na mwanasayansi  mwanamke wa kwanza Tanzania, Roshen Abdallah kwa niaba ya wanasayansi, alipozungumza na waandishi wa habari kwenye ziara ya kutembelea  kituo cha utafiti wa kilimo  Makutupora mkoani hapa. Alisema lengo lao ni kuwapatia wakulima teknolojia mpya na ya kisasa zaidi kupata mbegu sahihi na bora inayostahimili hali ya hewa ya aina yoyote. Alieleza kama waziri huyo atakubali kubadilisha kanuni hiyo na wakulima kutumia mbegu za mazao yaliyoboreshwa kutumia viini tete kwa njia ya uandisi, Jeni (GMO), taifa halitayumba tena kwa uhaba wa chakula. Kanuni hiyo ya mimea ya mwaka 2009 inasema kukiwepo madhara yoyote ya kimazingira yatakayosababishwa na mbegu, atawajibishwa kuanzia mwenye kiwanda, aliyesambaza mbegu, aliyefanya utafiti na walioshirikiana nao. “Kiukweli watafiti kutoka nchi za wenzetu wanaogopa kuja kushirikiana na sisi kutokana na kanuni hii kuwa ngumu, na utafiti kama huu huwezi kuufanya wewe mwenyewe, lazima kupata ushirikiano na watu kutoka nje,” alisema. Pia alisema nchi zinazoendelea wanatumia Jeni hiyo ambayo imeshafanyiwa utafiti kwa miaka 30 iliyopita. Naibu Waziri wa Kilimo, Chakula na Ushirika, Adam Malima, alisema wizara yake inataka kuona kilimo nchini kinakuwa cha ajira ya kudumu kwa wakulima. Aliwataka watafiti kuendelea na uchunguzi wa kina, ili kupata mbegu bora ya kilimo kwa taifa la Tanzania. Naye  Mratibu wa Water Efficient Maize For Africa (WEMA), Dk. Aloice Kullaya, alisema kama waziri hataiondoa kanuni  hiyo ya usalama kwa mimea, utafiti hautofanyika  na itasababisha Tanzania  kupata gharama kununua mbegu nchi jirani. Chanzo;Tanzania Daima