CRDB KUANZISHA MRADI WA NYUMBA

 Benki ya CRDB tawi la dodoma mjini kwa kushirikiana na halmashauri ya wilaya ya bahi mkoani hapa inatarajia kuanzisha mradi wa kuwajengea nyumba za gharama nafuu wananchi wenye kipato cha chini.
Hayo yalibainishwa juzi na meneja wa benki hiyo, rehema hamisi wakati akizungumza katika kikao cha baraza la madiwani katika wilaya hiyo na kuongeza kuwa mradi huo utawawezesha wakazi wa halmashauri hiyo kuondokana na nyumba za tembe na kujengewa nyumba za kisasa kwa gharama ya kati ya shilingi milioni 5 hadi 6 ambapo watatakiwa kurejesha kwa muda wa mwaka mmoja hadi miaka mitano.
Alieleza kuwa baadhi ya wananchi wenye kipato cha chini hawawezi kuweka pesa kiasi cha kutosha kujengea nyumba kwani pesa zao huishia kununulia chakula tu hivyo waliona ni vyema kushirikiana nao katika ujenzi wa nyumba hizo ili kuwawezesha kupata makazi bora na yenye hadhi.
"Hapa tumewalenga wananchi wenye kipato cha chini kabisa yaani wakulima na wafugaji ambao kutokana na kipato chao hawawezi kujenga nyumba za kisasa lakini wana uwezo wa kupata pesa pindi wanapouza mazao yao," alisema hamisi.
Aidha aliwataka madiwani hao kuwaelimisha wananchi wao taratibu za kupata mradi huo ili waweze kujengewa nyumba hizo ikiwa ni pamoja na kuunda vikundi mbalimbali vya uzalishaji mali pamoja na vyama vya kuweka na kukopa (saccos).
Naye mkuu wa wilaya ya bahi, betty mkwasa, alisema lengo la kuialika benki hiyo kuanzisha mradi huo wilayani hapo ni kuwawezesha wananchi wenye kipato cha chini kujenga nyumba nzuri za kisasa za kuishi kwani wengi wao hawana uwezo wa kujenga nyumba lakini wakikopeshwa wanaweza kulipia mkopo huo

CHANZO MAJIRA