Wajasiriamali watakiwa kuboresha bidhaa zao

Dodoma. Wajasiriamali nchini wametakiwa kutumia mafunzo wanayoyapata kwa njia mbalimbali kuboresha bidhaa zao ili waweze kushindanisha bidhaa zao katika masoko ya ndani na nje ya nchi.

Hayo yalisemwa juzi na Mkurugenzi wa Halmashauri ya Chamwino, Adrian Jungu, alipokuwa akifunga maonyesho ya wajasiriamali wa bidhaa za ngozi yaliyoandaliwa na Shirika la Kuhudumia Viwanda Vidogo Vidogo (Sido), mkoani hapa.

“Mtumie mafunzo yenu katika kuondoa upungufu wenu katika bidhaa mnazozitengeneza ili kuziboresha na hivyo kuongeza ushindani katika masoko ya ndani na nje ya nchi,” alisema Jungu.

Akimkaribisha kufunga maonyesho hayo, Meneja wa Sido mkoani hapa, Abeil Mapunda, alisema wajasiriamali wanane wamepata mafunzo katika kituo hicho cha mafunzo ya kutengeneza bidhaa za ngozi cha Kizota mjini hapa.

Alisema wajasiriamali hao walipata mafunzo ya wiki tatu ya kutengeneza mikanda, pochi za simu na viatu. “Kituo kilianza kutoa mafunzo mwaka 2011 na watu zaidi ya 200 wamenufaika na mafunzo,” alisema Mapunda.
Chanzo;Mwananchi