Bil. 28/- zatengwa kwa uzalishaji kuku

ZAIDI ya sh bilioni 20.8 zinatarajiwa kutumika kwa ajili ya kuanzisha mradi wa kilimo cha mahindi na ufugaji wa kuku wa kienyeji kwa wananchi waishio vijijini.

Kauli hiyo ilitolewa mjini hapa jana na Meneja wa mradi huo, Hem Chandro Roy, wakati alipokuwa akizungumza na gazeti hili.

Alisema mradi huo ambao unafadhiliwa na Shirika la Maendeleo la Serikali ya Uingereza (DFID) na kuendeshwa kwa kushirikiana na BRAC Tanzania, unatarajiwa kutekelezwa kwa kipindi cha miaka minne ambapo utawanufaisha wananchi kutoka mikoa 15 nchini.

Alitaja mikoa itakayonufaika na mradi huo kuwa ni pamoja na Dar es Salaam, Morogoro, Tanga, Zanzibar, Kilimanjaro, Arusha, Manyara, Singida, Tabora, Dodoma, Mbeya, Iringa, Mwanza, Shinyanga na Mara.

Alisema lengo la kuanzisha mradi huu ni kuwawezesha wakulima na wafugaji wadogo waishio vijijini waweze kujikwamua kiuchumi na kuondokana na umaskini.

Alifafanunua kuwa watasaidia kuboresha njia za kulifikia soko, kuboresha njia za kufikia huduma za fedha na kuamsha na kuhamasisha sekta binafsi ili kuwekeza katika kuongeza thamani na mlolongo wa mazao.

Alisema jumla ya wananchi 105,000 watanufaika na mradi huo huku Watanzania 104 wakipata ajira.

Chanzo: Tanzania Daima