Wenye ulemavu watakiwa kujiamini

WATU wenye ulemavu wametakiwa kujiamini kwa kujitokeza na kugombea nafasi mbalimbali za uongozi ndani ya Chama cha Watu Wenye Ulemavu Tanzania (CHAWATA) na nje ya chama badala ya kuwalalamikia viongozi waliopo madarakani.

Katibu wa Chawata Mkoa wa Dodoma na Kaimu Mwenyekiti wa Chawata taifa, John Mlabu, alitoa wito huo jana alipokuwa akifungua mkutano wa uchaguzi wa viongozi wa chama hicho Wilaya ya Dodoma Mjini.

Mlabu alisema watu wenye ulemavu pamoja na kuwa  na chama kikubwa, lakini hawapo tayari kujitokeza kuwania nafasi mbalimbali  na badala yake wamekuwa mabingwa wa kuwalalamikia viongozi waliopo madarakani kuwa hawatetei masilahi ya watu wa jamii hiyo.

Kiongozi huyo alisema watu wenye ulemavu wanapaswa watambue wanao wajibu wa kuwania nafasi mbalimbali za uongozi ndani ya chama na nje, ili kupata wepesi wa kutetea masilahi ya watu wenye ulemavu.

Katibu wa Chawata Wilaya ya Dodoma Mjini, Mchungaji Kalebi Mhawi, alisema chama hicho kimefanya mambo mengi kwa jamii ikiwa ni pamoja na kuwezesha kutoa matibabu kwa wale wenye uhitaji.

“Chawata wilaya tumeweza kujitahidi kuwatafuta wafadhili kwa ajili ya kuwapatia matibabu watu ambao walikuwa ni wagonjwa na wakati mwingine wagonjwa hao walihitaji fedha nyingi kwa ajili ya matibabu hususan ya upasuaji,” alisema.

Chanzo;Tanzania Daima